इगतपुरीनामा न्यूज – इगतपुरी तालुक्यात अनेक वर्ष जलसंपदा विभागात दारणा, मुकणे, भावली, वालदेवी इत्यादी विविध धरणावर निवृत्त अभियंता सुहास पाटील यांनी उत्कृष्ट सेवा बजावलेली आहे. त्यांचे सुपुत्र निशांत पाटील याने महाराष्ट्र लोकसेवा ( राज्यसेवा ) आयोगामार्फत झालेल्या नगररचना विभागाच्या प्रतिष्ठित “सहाय्यक नगर रचनाकार अधिकारी” या राजपत्रित अधिकारीपदी बाजी मारली आहे. त्याने मेरिट लिस्टमध्ये येण्याचा बहुमान मिळवत नाशिक जिल्ह्याच्या शिरपेचात आणखी एक मानाचा तुरा रोवला आहे. निशांत यांत पुण्याच्या डीवाय पाटील कॉलेजमधून स्थापत्य अभियांत्रिकी विषयात पदवी संपादन केली आहे. बडोदा येथून सयाजी महाराज गायकवाड विद्यापीठातून टाऊन प्लॅनिंग या विषयात पदव्युत्तर शिक्षण घेतले आहे. अथक परिश्रम आणि अभ्यासाच्या जोरावर आपल्या ज्ञानात आणि कौशल्यात सातत्य राखले, ज्याचे फलित त्याला मिळाले. हे उत्तुंग यश संपादन करतांना त्याने राज्यात ४९ वा क्रमांक मिळवला. त्यांच्या या कामगिरीमुळे त्यांचे कुटुंब वं संपूर्ण जिल्ह्याला त्यांचा अभिमान वाटत आहे. निशांतची आई सुनंदा पाटील यांनी लहानपणापासूनच योग्य मार्गदर्शन केले. वडील सुहास पाटील यांनी जलसंपदा विभागात नाशिक पाटबंधारे विभागात चांगली सेवा बजावली आहे. निवृत्तीनंतरही जलसंपदा विभागाचे निवृत्त अभियंता व सहकाऱ्यांच्या मदतीने गोरगरिबांना मदत, मोठ्या प्रमाणावर वृक्ष लागवड असे विविध सामाजिक उपक्रम राबवतात. सामाजिक क्षेत्रात व विविध संस्थांमध्ये ते कार्यरत आहेत. निशांत हा निर्मला कॉन्व्हेंटचा हुशार व अभ्यासू माजी विद्यार्थी आहे. त्याने आई वडिलांच्या व गुरुजनांच्या मार्गदर्शनाखाली चांगले यश संपादन केले. या पदाच्या माध्यमातून विविध शहरांचा विकास, निवासी, औद्योगिक व व्यावसायिक क्षेत्रांचा विकास, पाणीपुरवठा आणि इतर सुविधांचे पद्धतशीर नियोजन करणार असल्याचे निशांतने सांगितले. मित्र, आप्तस्वकीय कुटुंबजन, नातेवाईक, गुरुजन यांनी त्याचे अभिनंदन केले आहे.
