इगतपुरीनामा न्यूज – येशू ख्रिस्तांनी क्रुसावर आपले बलिदान दिले तो दिवस ‘गुड फ्रायडे’ म्हणून पाळला जातो. यानिमित्त इगतपुरीतील ख्रिस्ती बांधवांनी हातात क्रूस घेवून व श्वेत वस्त्र परिधान करून प्रमुख मार्गाने मिरवणूक काढली. यावेळी खांद्यावरून वधस्तंभ वाहून नेत शोकदिवस पाळण्यात आला. मिरवणुकीत येशुख्रिस्तांच्या जीवनातील विविध प्रसंग साकारण्यात आले होते. येशूला क्रूसावर चढविण्यात आले तो क्षण या जिवंत देखाव्याच्या स्वरुपात कलाकारांनी सादर केला. ख्रिस्तीबांधवांची इगतपुरीत तीन चार प्रमुख प्रार्थनास्थळांत धार्मिक कार्यक्रमांचे आयोजन करण्यात आले होते. सॅक्रेड हार्ट चर्चमध्ये फादर झेवियर यांच्या प्रवचनात त्यांनी वधस्तंभावर येशूंनी उच्चारलेल्या ‘हे बापा, त्यांना क्षमा कर, कारण ते काय करतात हे त्यांना कळत नाही’, ‘मी तुला खचित खचित सांगतो, आज तू माझ्यासोबत सुखलोकात असशील’, ‘बाई, पहा हा तुझा मुलगा, मुला पहा ही तुझी आई’, ‘माझ्या देवा! तू माझा त्याग का केला?’, ‘मला तहान लागली आहे’, ‘पूर्ण झाले आहे’, ‘हे बापा, मी माझा आत्मा तुझ्या हाती सोपवून देतो’, या सात वाक्यांवर प्रवचन दिले.याप्रसंगी चर्चचे धर्मगुरू फादर झेवियर, सर्व सिस्टर, आदी ख्रिस्ती बांधव मोठ्या संख्येने उपस्थित होते..
