निलेश काळे : इगतपुरीनामा न्यूज, दि. १५ – ग्रामीण भागातील रस्त्यांच्या दुखण्यांनी ग्रामीण भागात वैताग आलेला आहे. त्यातच आडवळणी भागात असलेल्या शेतात जाण्यासाठी शेतकरी दुचाकी वापरतात. अशा ठिकाणी दुचाकी पंचर झाल्यास ढकलत नेल्याशिवाय अन्य काहीही पर्याय नसतो. जास्तीचे अंतर पंचरच्या स्थितीत गेल्यास ट्यूब व टायर खराब होण्याचाही संभव असतो. ह्या पार्श्वभूमीवर गाडी पंचर झाल्यानंतर दुकानापर्यंत ढकलत नेऊन लागणारे शारीरिक कष्ट वाचवण्यासाठी एक उपकरण तयार करण्यात आले आहे. इगतपुरी तालुक्यातील श्री छत्रपती शिवाजी राजे भोसले विद्यालयातील सातवीचा विद्यार्थी अर्जुन गायकवाड ह्याने हे उपयुक्त उपकरण ( मॉडेल ) बनवले आहे. ह्या उपकरणांचे नाव ‘अ डिव्हाईस फॉर सेफ ट्रॅव्हल आफ्टर पंचर’ आहे. राज्य स्तरावरून हे उपकरण राष्ट्रीय पातळीवर निवडण्यात आले आहे. गाडी पंचर झाल्यानंतर दुकानापर्यंत ढकलत नेऊन लागणारे शारीरिक कष्ट वाचवण्यासाठी ह्या मॉडेलचा मोठा फायदा होणार आहे. अर्जुन गायकवाड ह्याला आर. बी. गुजर, एस. ई. परदेशी, ए. एस. शिंदे आदींनी मार्गदर्शन केले आहे.
ह्या विद्यार्थ्याने बनवलेले उपकरण गाडीच्या चाकाच्या ठिकाणी बसवण्यासाठीची एक जागा असून चाक पंचर झाल्यास उपकरणातील चाके खाली घेऊन पंचर झालेले चाके सहजच वर घेता येते. चाक वर घेतल्यास गाडी ढकलण्यास कोणताही त्रास होत नाही. पंचरच्या दुकानापर्यंत आरामात जाता येते. शिवाय ट्यूब-टायर खराब होण्यापासून वाचतो. आधुनिक तंत्रज्ञानाच्या काळात नवनवीन उपकरणे विकसित होत आहेत. शालेय पातळीवर होणाऱ्या विज्ञान प्रदर्शनात विद्यार्थी बुद्धीला चालना देऊन नवनवीन उपकरणे बनवतात. दैनंदिन जीवनात त्याचा उपयोग करून वेळेची व आर्थिक बचत करणारे उपकरण तयार करतात. उपकरण वापरल्याने होणारे फायदे कसे होतात हे दाखवण्याचा प्रयत्न करत असतात. ह्या उपकरणाची राज्य पातळीहून देश पातळीवर निवड झाल्याने अर्जुन गायकवाड याचा सत्कार करण्यात आला. यावेळी मुख्याध्यापक आर. बी. गुजर, एस. ई. परदेशी, राजेश भोसले, ईश्वर भोसले, राजेंद्र भोसले, कवडदराचे मुख्याध्यापक भाऊसाहेब गायकवाड, एस. पी. काळे, एम. एल. पवार, एस. ए. गुजर, जी. पी. जाधव, बी. एस. टोपे, पी. एन. गोरडे, डी. डी. भोसले, ए. एस. शिंदे, लिपिक व्ही. बी. बऱ्हे, व्ही. व्ही. घोटेकर, ए. बी. मूटकुळे, एस. जी. लाड, व्ही. एम.वाकचौरे व शालेय व्यवस्थापन समिती पदाधिकारी हजर होते. विद्यालयाचे निवृत्त कर्मचारी असणारे अर्जुन ह्याचे आजोबा श्री. गायकवाड ह्यांनी नातवाच्या यशाचे कौतुक करून कौतुकाची थाप दिली. जुन्या काळातील शाळेचे अनुभव सांगून उपस्थित विद्यार्थ्यांना पुढील शिक्षणासाठी शुभेच्छा दिल्या.