कवितांचा मळा : “डोंगरमाळ”

कवी : जी. पी. खैरनार, नाशिक, ९४२१५११७३७/ ७०८३२३४०२१

रानोमाळ हिरवाई,
साजती डोंगरावरी !
हिरवागार शालू,
शोभतसे भरजरी !!

                    निसर्गाची नवलाई,
                    दिसे पहा शेतावरी !
                    सप्तरंगी इंद्रधनु,
                    गोल दिसे नभावरी !!

वारा वाहे रानमाथा,
पडे पावसाच्या सरी !
मधी सूर्याची तिरीप,
रान दिसे सोनपरी !!

                    नभ दाटता आकाशी,
                    कोसळे पाऊस सरी !
                    ऊन पावसाची खेळी,
                    रान पहा दिसे भारी !!

कावळा चिमणी पक्षी,
राना वना मुक्त फिरी !
रानमेवा पाणी पिता,
घेई आकाशी भरारी !!

                    गाई म्हशी शेळ्या सवे,
                    फिरे बारीक वासरी !
                    साद घालण्या गुरांना,
                    गुराखी वाजे बासरी !!

निष्ठुर मानव जात,
जंगलाची तोड करी !
निसर्गाच्या जीवावर,
कुऱ्हाडीचा घाव मारी !!

                    सिमेंट जंगल ठेवा,
                    संपत्ती नसती खरी !
                    जपू जंगल संपदा,
                    वृक्ष संपत्तीच खरी !!