इगतपुरीनामा न्यूज – समृद्धी महामार्गावर मुंबई ते नागपूर लेनवर इगतपुरी बोगद्याजवळ गोवंशाची बेकायदेशीर वाहतूक करणाऱ्या एका आयशर ट्रकने रस्त्याच्या कडेला उभ्या असलेल्या तीन वाहनांना जोरदार धडक दिल्याची भीषण घटना समोर आली आहे. या अपघातात वाहनांचे मोठे नुकसान झाले असून पोलिसांनी ट्रकमधून १५ गोवंश जनावरांची सुटका करत आरोपी वाहनचालकाच्या विरोधात इगतपुरी पोलीस ठाण्यात विविध गंभीर कलमांखाली गुन्हा दाखल केला आहे. जावेद मोहम्मद नबी शेख (वय ३३, रा. भिवंडी, जि. ठाणे) असे आरोपीचे नाव असून तो स्वतःही या अपघातात जखमी झाला आहे. आज १ ऑगस्टला पहाटेच्या सुमारास आरोपी जावेद शेख हा त्याच्या ताब्यातील चॉकलेटी रंगाच्या आयशर ट्रकमधून (क्र. MH-03 DV-4833) १५ गोवंश जनावरांची बेकायदा वाहतूक करत होता. जनावरांना आखूड दोराने क्रूरपणे बांधणे, चारापाण्याची तसेच प्रथमोपचार पेटीची व्यवस्था न करणे, पाय घसरू नये म्हणून अँटी-स्लिपरी मटेरियल न वापरणे, प्रत्येक पशुसाठी स्वतंत्र कंपार्टमेंट न बनवणे आणि शासकीय नियमांचे उल्लंघन करून विना इयर-टॅगिंग अशा अनेक नियमांचे उल्लंघन करून तो हा माल नेत होता. दरम्यान, समृद्धी महामार्गावर इगतपुरी बोगद्याजवळ आल्यावर आरोपीने आपली आयशर गाडी भरधाव व बेदरकारपणे चालवली. रस्त्यावरील परिस्थितीकडे दुर्लक्ष करून त्याने डाव्या बाजूला उभ्या असलेल्या अशोक लेलँड ट्रक (MH-05 EL-3731), इर्टिगा कार (MP-04 YF-5969) आणि एका नंबर नसलेल्या ट्रेलरला पाठीमागून जोरदार धडक दिली. या अपघातात या वाहनांचे मोठे नुकसान झाले आहे. घटनास्थळाची पाहणी करून पोलिसांनी ट्रकमधून अंदाजे ५ ते ६ वर्षे वयाची १५ गोवंश जनावरे (किंमत अंदाजे ३ लाख रुपये) आणि ५ लाख रुपये किंमतीचा आयशर ट्रक असा एकूण ८ लाख रुपयांचा मुद्देमाल जप्त केला आहे. जनावरांची सुटका करून त्यांना योग्य निवाऱ्यात हलवण्यात आले आहे. याप्रकरणी अधिवक्ता आशिष कमलाकांत बारीक (वय २९, रा. घाटकोपर पश्चिम, मुंबई) यांनी दिलेल्या फिर्यादीवरून इगतपुरी पोलीस ठाण्यात गुन्हा दाखल करण्यात आला आहे. पोलिसांनी आरोपीविरोधात प्राणी संरक्षण कायदा १९६०, भारतीय न्याय संहिता (BNS) कलम २८१, १२५(अ), ३२४(४), मोटार वाहन कायदा, तसेच प्राण्यांचे परिवहन अधिनियम १९७८ अंतर्गत गुन्हा नोंदवला आहे. विशेष म्हणजे, या आरोपीविरुद्ध यापूर्वी देखील इगतपुरी पोलीस ठाण्यात जनावरांची तस्करी व अपघाताचे दोन गुन्हे दाखल असल्याचे पोलीस तपासात निष्पन्न झाले आहे. इगतपुरी पोलिसांनी पुढील तपास सुरु केला आहे. व्हिडीओ बातमी पहा https://youtube.com/shorts/kfsk4a_zokw?si=KHYj96TwYIyUnS8O