इगतपुरीनामा न्यूज – महाराष्ट्राचे मुख्यमंत्री ना. देवेंद्र फडणवीस यांच्या वाढदिवसाचे औचित्य साधून संपूर्ण महाराष्ट्रात विविध समाजोपयोगी व लोककल्याणकारी उपक्रमांचे आयोजन करण्यात येत आहे. याच जनसेवेच्या पर्वाचा एक भाग म्हणून घोटी येथील सुप्रसिद्ध मातोश्री हॉस्पिटलच्या वतीने वाडीवऱ्हे (ता. इगतपुरी) येथील प्राथमिक आरोग्य केंद्राच्या सहकार्याने भव्य मोफत सर्वरोग निदान शिबिराचे आयोजन करण्यात आले आहे. गुरुवारी ३० जुलैला सकाळी ९ ते ५ वाजेपर्यंत हे शिबीर वाडीवऱ्हे येथील प्राथमिक आरोग्य केंद्रात होणार आहे. या शिबिराला परिसरातील सर्वसामान्य, गरीब आणि गरजू नागरिकांनी उत्स्फूर्त प्रतिसाद द्यावा असे आवाहन मातोश्री हॉस्पिटलचे संचालक डॉ. जितेंद्र चोरडिया, डॉ. हेमलता चोरडिया यांनी केले आहे. आरोग्याच्या पुरेशा सुविधा आणि आर्थिक अडीअडचणींमुळे वेळेवर उपचार न घेऊ शकणाऱ्या नागरिकांसाठी हा उपक्रम एक मोठा दिलासा ठरणार आहे. या शिबिरामध्ये विविध आजारांनी ग्रस्त असलेल्या रुग्णांची कसून तपासणी करण्यासाठी मातोश्री हॉस्पिटलमधील नामांकित आणि अनुभवी वैद्यकीय तज्ज्ञ डॉक्टर उपस्थित राहणार आहेत.
ह्या शिबिरामध्ये मधुमेह, उच्च रक्तदाब, स्त्रीरोग, नेत्ररोग, हाडे व सांधेदुखी, पोट व पोटाचे विकार यांसारख्या विविध आजारांवर रुग्णांची तपासणी करून निदान करण्यात येईल. या शिबिराचे सर्वात मोठे वैशिष्ट्य म्हणजे, तपासणीदरम्यान ज्या रुग्णांना शस्त्रक्रियेची गरज असल्याचे निष्पन्न होईल अशा सर्व रुग्णांच्या शस्त्रक्रिया घोटी येथील सुप्रसिद्ध मातोश्री हॉस्पिटलमध्ये पूर्णपणे मोफत केल्या जाणार आहेत. उपचाराचा संपूर्ण खर्च व रुग्णालयीन सोयी सुविधा मोफत उपलब्ध होणार असल्यामुळे गरजू रुग्णांना फायदा होणार आहे. मुख्यमंत्री देवेंद्र फडणवीस यांच्या वाढदिवसाचे औचित्य साधून ग्रामीण भागातील सर्वसामान्यांपर्यंत दर्जेदार आरोग्य सेवा पोहोचवण्यासाठी मातोश्री हॉस्पिटलचे व्यवस्थापन, वैद्यकीय अधिकारी आणि संपूर्ण चमू परिश्रम घेत आहेत. अशा उपक्रमांमुळे ग्रामीण भागातील आरोग्य यंत्रणेला बळ मिळणार असून गोरगरिबांना हक्काचा व मोफत वैद्यकीय आधार मिळेल.
