इगतपुरीनामा न्यूज – त्र्यंबकेश्वर पोलीस ठाण्याच्या हद्दीत तळेगाव शिवारात स्वामी समर्थ केंद्राजवळ पडलेल्या दरोड्याच्या गंभीर गुन्ह्यात पोलिसांनी अवघ्या काही तासांतच मोठी कारवाई केली आहे. त्र्यंबकेश्वर पोलिसांनी ‘डायल ११२’ प्रणालीचा प्रभावी वापर करत जलदगतीने सापळा रचून तब्बल ११ आरोपींना अटक केली आहे. विशेष म्हणजे, यातील ९ आरोपी हे इगतपुरी तालुक्यातील आहेत. रविवारी २६ जुलैला पहाटे ३ वाजेच्या सुमारास १० ते १२ अज्ञात दरोडेखोरांनी तोंडास रुमाल बांधून साईट साईट सुपरवायझर ज्ञानेश्वर सुळे व साक्षीदार यांना मारहाण व दमदाटी केली. आरोपींनी तलवार, कुऱ्हाड, लोखंडी रॉड, कटर आणि कोयता यांसारख्या घातक शस्त्रांचा धाक दाखवून साक्षीदाराला दुखापत करण्याच्या हेतूने पळवून नेले. या दरोडेखोरांनी घटनास्थळावरून ११ लाख ११ हजार ५० रुपये किमतीचा मुद्देमाल बळजबरीने चोरून नेला, यामध्ये साईटवरील ट्रॅक्टर, इलेक्ट्रीक सबस्टेशनवर वापरण्यात येणाऱ्या SQMM कंडक्टर वायरचे दोन ड्रम, मोबाईल फोन यांचा समावेश होता. घटना घडताच फिर्यादी ज्ञानेश्वर सुळे यांनी न घाबरता तात्काळ ‘डायल ११२’ प्रणालीवर कॉल करून त्र्यंबकेश्वर पोलिसांना माहिती दिली. माहिती मिळताच त्र्यंबकेश्वर पोलीस ठाण्याचे पोलीस निरीक्षक, दुय्यम अधिकारी आणि गस्तीवरील अंमलदार यांनी क्षणाचाही विलंब न करता तातडीने घटनास्थळ गाठले. आरोपींचा पाठलाग करून पोलिसांनी अत्यंत शिताफीने सापळा रचून आरोपींना ताब्यात घेतले. आपत्कालीन स्थितीत ‘डायल ११२’ प्रणाली किती वेगाने आणि परिणामकारक काम करू शकते याचे हे उत्तम उदाहरण ठरले आहे. नाशिक ग्रामीणचे जिल्हा पोलीस अधीक्षक, अपर पोलीस अधीक्षक आणि उपविभागीय पोलीस अधिकारी यांच्या मार्गदर्शनाखाली त्र्यंबकेश्वर पोलीस ठाण्याच्या पथकाने ही कामगिरी केली आहे. या गुन्ह्यातील उर्वरित मुद्देमाल आणि इतर पसार आरोपींचा शोध त्र्यंबकेश्वर पोलिसांकडून घेतला जात असून पुढील तपास सुरू आहे. ( सविस्तर बातमी पुढच्या रकान्यात वाचा )
या गुन्ह्यात एकूण ११ जणांना अटक करण्यात आली असून त्यामध्ये तब्बल ९ जण इगतपुरी तालुक्यातील आहेत. अटक केलेल्या आरोपींमध्ये मनिष मदन सिंग (वय २१, रा. एक्स्लो पाईंट, दत्तनगर, इंगोले संकुल, अंबड, नाशिक), रोशन खंडू पाटील (वय ३०, रा. वाडीवऱ्हे, ता. इगतपुरी, जि. नाशिक), योगेश कुमार सीताराम कुमार (वय ३४, रा. केवल पार्क, अंबड लिंक रोड, अंबड, नाशिक), गणेश कैलास कातोरे (वय १९, रा. वंजारगल्ली, वाडीवऱ्हे, ता. इगतपुरी, जि. नाशिक), अथर्व संजय सारूक्ते (वय १९, रा. मालुंजकर गल्ली, वाडीवऱ्हे, ता. इगतपुरी, जि. नाशिक), समाधान शिवाजी मालुंजकर (वय १८, रा. मालुंजकर गल्ली, वाडीवऱ्हे, ता. इगतपुरी, जि. नाशिक), पियुष अंबादास गवते (वय १८, रा. वाडीवऱ्हे, ता. इगतपुरी, जि. नाशिक), कुणाल शरद चोथे (वय १९, रा. वंजारगल्ली, वाडीवऱ्हे, ता. इगतपुरी, जि. नाशिक), शेखर जीवन अस्वले (वय १८, रा. वाडीवऱ्हे, ता. इगतपुरी, जि. नाशिक), अजय जीवन चोथे (वय १९, रा. वंजारवाडी, वाडीवऱ्हे, ता. इगतपुरी, जि. नाशिक), मनोज शांताराम मुर्तडक (वय २०, रा. वंजारवाडी, वाडीवऱ्हे, ता. इगतपुरी, जि. नाशिक) यांचा समावेश आहे. सर्व आरोपींविरुद्ध त्र्यंबकेश्वर पोलीस ठाण्यात गुन्हा नोंद क्र. १२५/२०२६ भारतीय न्याय संहिता (BNS) कलम ३१०(२), १४०(३) नुसार दरोड्याचा गुन्हा दाखल करण्यात आला आहे. पोलिसांनी आरोपींच्या ताब्यातून ६ लाख ८० हजार रुपये किमतीचा मुद्देमाल हस्तगत केला आहे. यात महिंद्रा कंपनीचा ट्रॅक्टर SQMM कंडक्टर वायर, ५ मोबाईल फोन, गुन्ह्यात वापरलेली हत्यारे लोखंडी कैचीचे कटर, कुऱ्हाड, तलवार, कोयता, पक्कड आणि स्क्रू ड्रायव्हर हा मुद्धेमाल ताब्यात घेतला आहे.