इगतपुरीनामा न्यूज – इगतपुरी पोलीस ठाण्याच्या हद्दीत सोमवारीसायंकाळी ७ वाजेच्या दरम्यान एका अज्ञात ठगाने पोलीस असल्याचे भासवून सेवानिवृत्त ज्येष्ठ नागरिकाची फसवणूक केल्याची घटना समोर आली आहे. याप्रकरणी इगतपुरी पोलीस ठाण्यात गुन्हा दाखल करण्यात आला आहे. फिर्यादी यशवंत मुरलीधर तोकडे, वय ६६ वर्षे, रा. दत्त नगर, गिरणारे, ता. इगतपुरी, जि. नाशिक हे गिरणारे येथील आदित्य किराणा स्टोअर्स येथे सामान घेण्यासाठी गेले होते. फिर्यादी दुकानात असताना एका अनोळखी इसमाने (वय अंदाजे ३० ते ३५ वर्षे, अंगात काळ्या रंगाचा रेनकोट आणि डोक्यात हेल्मेट घातलेला मोटर सायकलस्वार) त्यांना हाक मारून जवळ बोलावले. आपण पोलीस डिपार्टमेंटचा असल्याचे सांगून त्याने जवळचे पोलिसाचे ओळखपत्र दाखवले. “आत्ताच गुटखा विकणारे दोन आरोपी या रस्त्याने पळाले असून मला साहेबांनी चौकशी कामी पाठवले आहे, त्यामुळे तुम्ही तुमच्या जवळील सोने काढून द्या,” असे सांगून आरोपीने फिर्यादीची दिशाभूल केली. भितीपोटी फिर्यादीने रुमालात ७.७२० ग्रॅम वजनाची सोन्याची चेन (किंमत रु. ४९ हजार ४०५), ८ ग्रॅम वजनाच्या दोन सोन्याच्या अंगठ्या (किंमत रु. ३२ हजार ४९০) असे एकूण १५.७२० ग्रॅम वजनाचे सोने एकूण किंमत ७३ हजार ९१८ रुपये किमतीचे दागिने हे काढून दिले. आरोपीने सोन्याचे दागिने आणि घड्याळ असलेला रुमाल फिर्यादीच्या पॅन्टच्या खिशात ठेवला आणि “तुमच्या वस्तू तुम्हाला परत दिल्या” असे सांगून आपली मोटारसायकल घेऊन इगतपुरी शहराकडे निघून गेला. त्यानंतर फिर्यादी घरी गेल्यानंतर त्यांनी खिशातून रुमाल काढून गाठ सोडली असता, त्यात सोन्याची चेन व अंगठ्या दिसून आल्या नाहीत, केवळ घड्याळ आढळले. हेल्मेट व रेनकोट घातलेल्या त्या भामट्याने अशा प्रकारे हातचलाखी करून फसवणूक केल्याचे लक्षात आल्यानंतर फिर्यादीने इगतपुरी पोलिसात धाव घेतली. इगतपुरी पोलीस या प्रकरणाचा पुढील तपास करत आहेत.
