इगतपुरीनामा न्यूज – खेड भैरव गावचे कर्तव्यदक्ष पोलीस पाटील अंकुश अरुण वाजे ( वय ३२ ) यांचे एका दुर्दैवी अपघातात निधन झाले आहे. त्यांच्या निधनामुळे इगतपुरी तालुका, खेड भैरव परिसर आणि महसूल व पोलीस प्रशासनात मोठी शोककळा पसरली आहे. प्राथमिक माहितीनुसार, अंकुश वाजे हे काही कामानिमित्त सोनांबे भागात जात असताना अपघात घडला होता. अपघाताची बातमी समजताच स्थानिक ग्रामस्थ आणि नातेवाईकांनी घटनास्थळी व रुग्णालयात धाव घेतली. पाच दिवसापासून त्यांच्यावर उपचार सुरु होते. उपचार सुरु असतांना आज त्यांची प्राणज्योत मालवली. अंकुश वाजे हे आपल्या कार्यकाळात अत्यंत कार्यतत्पर आणि सामाजिक कार्यात अग्रेसर होते. पोलीस पाटील म्हणून त्यांनी गावच्या शांतता व सुव्यवस्थेसाठी नेहमीच मोलाचे योगदान दिले. त्यांच्या निधनाने गावाने एक अभ्यासू आणि मदतीला तत्पर असणारा पोलीस पाटील गमावला आहे. त्यांच्या निधनाबद्दल स्थानिक लोकप्रतिनिधी, प्रशासकीय अधिकारी आणि ग्रामस्थांनी तीव्र दुःख व्यक्त करत त्यांना भावपूर्ण श्रद्धांजली वाहिली आहे. त्यांच्या मागे आईवडील, भाऊ, पत्नी, मुलगा, मुलगी असा परिवार, मित्रपरिवार आणि मोठा चाहता वर्ग आहे. राष्ट्रवादी काँग्रेसचे तालुकाध्यक्ष पांडुरंग वारुंगसे आणि लेखापरीक्षक विष्णू वारुंगसे यांचे ते भाचे होते.
