इगतपुरीनामा न्यूज – शिक्षण क्षेत्रात घोटी येथील होतकरू विद्यार्थ्यांनी आपली गुणवत्ता सिद्ध केली आहे. घोटी येथील अल्पबचत प्रतिनिधी निलेश पाटील यांचे सुपुत्र अथर्व निलेश पाटील याने नुकत्याच पार पडलेल्या महत्त्वाच्या अभियांत्रिकी प्रवेश परीक्षांमध्ये चमकदार कामगिरी करत यश संपादन केले आहे. अथर्वने JEE (Main) परीक्षेत ९६ पर्सेंटाईल मिळवले असून, MHT-CET परीक्षेत ९८.६७ पर्सेंटाईल इतके उच्चांकी गुण प्राप्त करून आपल्या यशाची मोहोर उमटवली आहे. अथर्व यास जनसेवा पतसंस्था व मेहुल शहा यांचे मार्गदर्शन लाभले. त्याच्या या यशाबद्दल परिसरातून त्याचे कौतुक होत आहे. अथर्वच्या या अभूतपूर्व यशामुळे त्याच्यावर अभिनंदनाचा वर्षाव होत आहे. त्याच्या या कामगिरीची दखल घेत घोटी येथील जनसेवा पतसंस्था परिवाराच्या वतीने अथर्वचा विशेष सत्कार करण्यात आला. यावेळी पारस राखेचा, अभय बोथरा, विरेंद्र बेदमुथा, राजेंद्र वालतुले, प्रमोद बेदमुथा, संदीप आंबेकर, दीपक साखला आदींनी अथर्वला त्याच्या पुढील वाटचालीस शुभेच्छा दिल्या. आपल्या मुलाच्या यशाबद्दल बोलताना निलेश पाटील यांनी अथर्वच्या जिद्दीचे आणि मेहनतीचे कौतुक केले. अथर्वच्या या यशामुळे घोटी परिसरातील विद्यार्थ्यांसाठी तो एक प्रेरणास्थान ठरला आहे.
