इगतपुरीनामा न्यूज – रोटरी क्लब ऑफ इगतपुरी ग्रीन हिल्सचे अध्यक्ष गोरख बोडके यांच्या वाढदिवसानिमित्त इगतपुरी तालुक्यात अत्यंत स्तुत्य आणि सामाजिक उपक्रमांचे आयोजन करण्यात आले. या विशेष दिनाला त्यांनी दिलेल्या शब्दाचे औचित्य साधून तालुक्यातील जिल्हा परिषद शाळांना आधुनिक शिक्षणासाठी आवश्यक असलेले संगणक संच वाटप करण्यात आले, तर इगतपुरी तालुकावासीयांच्या आरोग्यसेवेसाठी मोफत रुग्णवाहिका सेवेचे लोकार्पण करण्यात आले. इगतपुरीचे माजी आमदार शिवराम झोले यांनी रुग्णवाहीकेची फीत कापून उदघाटन केले. रोटरीचे गवर्नर ज्ञानेश्वर शेवाळे, अध्यक्ष गोरख बोडके, निमाचे माजी अध्यक्ष धनंजय बेळे, उद्योजक भरत गजेरिया, वैभव चावक, अजय चव्हाण, संदीप बनभेरू यांच्या हस्ते शाळांना संगणक संच प्रदान करण्यात आले. पदाधिकाऱ्यांनी आपल्या मनोगतात गोरख बोडके यांच्या कार्याचे कौतुक करून उपक्रमाची प्रशंसा केली.
यामुळे ग्रामीण भागातील विद्यार्थ्यांच्या डिजिटल शिक्षणाचा मार्ग सुकर झाला असून, आरोग्यविषयक आणीबाणीच्या काळात नागरिकांना वेळेवर उपचार मिळण्यास मोठी मदत होणार आहे. ग्रामीण विद्यार्थ्यांपर्यंत आधुनिक तंत्रज्ञान पोहोचावे, या उद्देशाने गोरख बोडके यांनी धामडकीवाडी, माणिकखांब, मोडाळे, कांचनगाव, वाकी ह्या जि. प. शाळांसह माध्यमिक विद्यालय मुकणे, आदिवासी आश्रमशाळा खडकेद, संत ज्ञानेश्वर वसतिगृह घोटी, मानवधन संस्था यांना संगणक संच भेट दिले. अजूनही अनेक शाळांना संच वाटप केले जाणार आहे. यामुळे विद्यार्थ्यांचा शैक्षणिक दर्जा उंचावण्यास आणि त्यांना तंत्रज्ञानाची ओळख होण्यास मदत होणार आहे. इगतपुरीतील दुर्गम आणि गरजू रुग्णांना तातडीने आरोग्य सुविधा मिळाव्यात, यासाठी रोटरीतर्फे मोफत रुग्णवाहिका सेवा कार्यान्वित करण्यात आली आहे. अपघाताच्या वेळी किंवा गंभीर आजाराच्या प्रसंगी ही रुग्णवाहिका नागरिकांसाठी वरदान ठरणार आहे. या उपक्रमांबद्दल सर्व स्तरांतून गोरख बोडके यांचे कौतुक होत आहे. याप्रसंगी रोटरी क्लब ऑफ इगतपुरी ग्रीन हिल्सचे पदाधिकारी, सदस्य, शाळांचे शिक्षक आणि ग्रामस्थ मोठ्या संख्येने उपस्थित होते.
