इगतपुरीनामा न्यूज – इगतपुरी विधानसभा मतदार संघातील सिटू संलग्न अंगणवाडी कर्मचारी, आशा व गटप्रवर्तक, शालेय पोषण आहार कर्मचारी, स्त्री परिचर कर्मचारी, बांधकाम कामगार व औद्योगिक कामगार व रोथे एर्डे, इनफिल्म इंडिया व धुमाळ इंडस्ट्रीजच्या औद्योगिक कामगारांच्या प्रलंबित प्रश्नासाठी वाडीवऱ्हे येथे इगतपुरीचे आमदार हिरामण खोसकर यांच्या उपस्थितीत जनसंवाद सभेचे आयोजन करण्यात आले होते. यामाध्यमातून तालुक्यातील कामगारांचे प्रलंबित प्रश्न आमदार खोसकर यांना सांगण्यात आले. हे प्रश्न सोडवण्याच्या दृष्टीने आमदारांनी शासन दरबारी हस्तक्षेप करण्याची मागणी सीटुचे जिल्हाध्यक्ष कॉ. सिताराम ठोंबरे, जिल्हा सरचिटणीस कॉ. देविदास आडोळे, सेक्रेटरी कॉ. अरविंद शहापुरे, कॉ. पांडुरंग काटकर, कॉ. भाऊसाहेब जाधव, कॉ. रवी कातोरे, कॉ. शरद बोराडे व शेकडो कामगारांनी केली. रोथे एर्डेच्या कमी केलेल्या कामगारांसह सर्वांना कामावर घेऊन कायम करावे, वेतनवाढ द्यावी, धुमाळ इंडस्ट्रीच्या कामगारांचा वेतन वाढ करार करावा, कमी केलेल्या कामगारांना कामावर घ्यावे या मागण्या यावेळी करण्यात आल्या. यासह किमान वेतन दरमहा ३० हजार रुपये करावे, वर्षानुवर्षे काम करणाऱ्या अंगणवाडी, आशा गटप्रवर्तक, शालेय पोषण स्त्री परिचर यांची कामे कायम करावी, त्यांना सरकारी कर्मचाऱ्यांचा दर्जा व वेतन श्रेणी द्यावी, औद्योगिक क्षेत्रातील कंत्राटी पद्धतीवर बंदी घालावी, वर्षानुवर्षे काम करणाऱ्या कंत्राटी कामगारांना कायम करावे त्यांना समान कामाला समान वेतन लागू करावे, सर्व कामगारांना ईएसआयसी, प्राव्हीडंट फंड, रजा, बोनस, विमा, महागाई भत्ता लागू करण्यात यावा, अंगणवाडी, आशा गटप्रवर्तक शालेय पोषण इत्यादी योजना कर्मचाऱ्यांना सरकारी कर्मचाऱ्यांचा दर्जा द्यावा व वेतनश्रेणी लागू करावी, कामगार विरोधी ४ श्रमसंहितेची महाराष्ट्रात अंमलबजावणी करू नये या मागण्या यावेळी करण्यात आल्या. आमदारांनी सिटू संघटनेची भूमिका समजून घेतली व हे प्रश्न सोडवण्यासाठी सहकार्य करण्याचे आश्वासन दिले. संबंधित मंत्री महोदया बरोबर बैठक लावण्याचे आश्वासनही दिले.