इगतपुरीनामा न्यूज – महाराष्ट्र राज्य पोलीस पाटील संघाच्या नुकत्याच पार पडलेल्या राज्यस्तरीय आढावा बैठकीत महत्त्वाची नियुक्ती करण्यात आली आहे. यामध्ये मनिषा मोहन बऱ्हे यांची महिला जिल्हाध्यक्षपदी निवड करण्यात आली आहे. त्यांच्या या निवडीमुळे पोलीस पाटील संघटनेच्या महिला आघाडीला नवी ऊर्जा मिळाली असून, जिल्ह्यातून त्यांचे सर्वस्तरातून अभिनंदन होत आहे. आळंदी येथे आयोजित करण्यात आलेल्या राज्यस्तरीय आढावा बैठकीत संघटनेच्या वरिष्ठ पदाधिकाऱ्यांनी मनिषा बऱ्हे यांच्या कार्याचा आणि त्यांच्या निष्ठेचा विचार करून ही जबाबदारी त्यांच्या खांद्यावर सोपवली आहे. या बैठकीला राज्यभरातील पोलीस पाटील मोठ्या संख्येने उपस्थित होते. निवडीनंतर प्रतिक्रिया देताना मनिषा बऱ्हे म्हणाल्या की, “संघाने माझ्यावर जी विश्वासाची जबाबदारी सोपवली आहे, ती मी प्रामाणिकपणे पार पाडेन. जिल्ह्यातील महिला पोलीस पाटलांच्या अडीअडचणी सोडवण्यासाठी आणि संघटनेचे हात बळकट करण्यासाठी मी कटिबद्ध आहे.” राज्याध्यक्ष बाळासाहेब शिंदे यांनी आपल्या मार्गदर्शनात नाशिक जिल्ह्यातील पदाधिकाऱ्यांनी केलेल्या कार्याची विशेष दखल घेतली. “नाशिकमधील महिला पदाधिकाऱ्यांचे काम कौतुकास्पद आहे आणि त्यांच्या निवडीमुळे संघटनेला नवी ऊर्जा मिळेल,” असा विश्वास व्यक्त केला. मनिषा बऱ्हे यांच्या निवडीमुळे जिल्ह्यातील महिला पोलीस पाटलांमध्ये आनंदाचे वातावरण आहे. त्यांच्या निवडीबद्दल विविध स्तरांतून त्यांना शुभेच्छा दिल्या जात आहेत. राज्याध्यक्ष बाळासाहेब शिंदे, राज्य महिला अध्यक्षा तृप्ती माडेकर, राज्य सल्लागार समिती अध्यक्ष चिंतामण मोरे, निमंत्रक संचालक अशोक सांगळ, संपर्कप्रमुख सोमनाथ मुळाणे, विजय वाळुंज आणि बाळासाहेब पवार, नाशिक जिल्हाध्यक्ष मच्छिंद्र खातळे, जिल्हा सचिव शंकरराव तुंगार, उपाध्यक्ष गजानन भोर, भाऊसाहेब गायकवाड, परशुराम चौधरी, सुभाश कामडी, कैलास जाधव, ज्ञानेश्वर सूर्यवंशी, ज्ञानेश्वर रहाडे, रमेश ताकाटे, सोमनाथ बेझेकर, अनिल जाधव, सम्राट राऊत, राजाराम गायकवाड, मधुकर गावित, दौलत देशमुख, मारुती पिंगट, ज्ञानेश्वर दोंड, हिरामण देवरे, प्रभाकर ठेपणे, सुनील वाघ, नारायण अपसुंदे, एकनाथ अनवत, राजेंद्र महाले, हिरामण भुसारे आणि संतोष वडजे यांच्यासह मोठ्या संख्येने पोलीस पाटील उपस्थित होते. इगतपुरी तालुकाध्यक्ष अनिल पाटील जाधव, उपाध्यक्ष नीता गुंजाळ, कार्याध्यक्ष ज्ञानेश्वर बऱ्हे, तालुका सचिव सदाशिव भोसले, संघटक अर्चना घारे, सविता घाडगे यांनी सौ. बऱ्हे यांना शुभेच्छा देऊन अभिनंदन केले. या आढावा बैठकीने संघटनेला एक नवीन दिशा दिली असून, विशेषतः महिलांचे सक्षमीकरण आणि नाशिक जिल्ह्यातील कार्यकर्त्यांचा वाढलेला सहभाग यामुळे आगामी काळात संघटनेचे काम अधिक प्रभावीपणे होईल, अशी अपेक्षा व्यक्त केली जात आहे.