इगतपुरीनामा न्यूज – इगतपुरी पोलीस ठाण्याच्या हद्दीतील पिंप्री सदो शिवारात भरवण्यात आलेल्या पीर सद्रोद्दीन शाह बाबा यांच्या उरुस यात्रेत नागरिकांना दहशत व धाक दाखवून बेकायदेशीरपणे पार्किंग वसुली करणाऱ्या टोळीवर इगतपुरी पोलिसांनी धडक कारवाई केली आहे. याप्रकरणी मुख्य सूत्रधारासह एकूण ६ जणांविरोधात भारतीय न्याय संहितेच्या कलम ३३६(३), ३३८, ३०८(२) या गंभीर कलमांन्वये इगतपुरी पोलीस ठाण्यात गु.र.नं. २१०/२०२६ गुन्हा दाखल करण्यात आला आहे. पोलीस हवालदार निलेश कृष्णा देवराज यांनी फिर्याद दिली. ही घटना पिंप्री सदो शिवार, हिंदू हृदयसम्राट बाळासाहेब ठाकरे समृद्धी महामार्गाखाली शनिवारी ३ ऑक्टोबरला रात्री ११ वाजेच्या सुमारास घडली. उरुसासारख्या धार्मिक व सांस्कृतिक कार्यक्रमात नागरिकांना वेठीस धरणाऱ्या अशा समाजकंटकांवर इगतपुरी पोलिसांनी केलेल्या या तडाखेबंद कारवाईमुळे परिसरात खळबळ उडाली आहे.
इगतपुरी परिसरातील पिंप्री सदो येथे पीर सद्रोद्दीन शाह बाबा यांच्या उरूस यात्रेनिमित्त २ ते ५ ऑक्टोबर २०२६ दरम्यान मोठी गर्दी जमणार होती. याच संधीचा फायदा घेत आरोपींनी संगनमत करून उरुसासाठी येणाऱ्या भाविकांकडून बळजोरीने पैसे उकळण्याचा घाट घातला. मुख्य आरोपी सायमन उर्फ मोठा पापा पॅट्रीक मँनवेल याच्या गुन्हेगारी प्रवृत्तीचा धाक आणि दहशत निर्माण करून, त्याच्या सांगण्यावरून इतर ५ जण बनावट पावती पुस्तके छापुन वाहन पार्किंगच्या नावाखाली भाविकांकडून प्रत्येकी १०० ते १५० रुपये जबरदस्तीने गोळा करत होते. या अवैध प्रकाराची माहिती मिळताच पोलिसांनी तात्काळ घटनास्थळी धाव घेत कारवाई केली. सायमन उर्फ मोठा पापा पॅट्रीक मँनवेल, जॉन उर्फ छोटा पापा पॅट्रीक मॅनवेल,रा. गायकवाड नगर, इगतपुरी, गोल्डी दास, अक्षय सुहास साळवे, रा. आंबेडकर नगर, इगतपुरी, जफील जमील पटेल, रिहान राजू शेख रा. पिंप्री सदो अशी संशयित आरोपींची नावे आहेत. पोलीस पथकाने कारवाई दरम्यान १० हजार रुपये किमतीचे २ वॉकीटॉकी जप्त केले आहेत. २ आरोपींच्या विरोधात यापूर्वीही गंभीर गुन्हे दाखल असून त्यांच्यावर प्रतिबंधक कारवाई देखील करण्यात आलेली आहे. इगतपुरी पोलीस अधिक तपास करीत आहेत.
