इगतपुरीनामा न्यूज – घोटीसारख्या ग्रामीण भागात इयत्ता सहावीत शिकत असतांना आईवडील आणि संपूर्ण परिवाराच्या मार्गदर्शनाने इगतपुरी तालुक्यातील १२ वर्ष वयाचा पहिला बालशाहीर घडला आहे. महाराष्ट्र राज्य सांस्कृतिक कार्य संचालनालयातर्फे वाघेरे येथे आनंदतरंग फाउंडेशनतर्फे शाहिरी प्रशिक्षण शिबिरात बालशाहीर मन्वंतर बाळासाहेब जाधव याला सूचना व प्रसारण मंत्रालयाचे क्षेत्रीय कार्यक्रम अधिकारी सदाशिव मलखेडकर आणि आयोजक शाहीर उत्तम गायकर यांनी शाहीर पदवीचे प्रमाणपत्र देऊन सन्मान केला. लोप पावणाऱ्या लोककला जतन करण्यासाठी इगतपुरी तालुक्यातील पहिला बाल शाहीर मन्वंतर बाळासाहेब जाधव याचे योगदान इगतपुरी तालुक्याला लाभणार असल्याचे यावेळी मान्यवरांनी सांगितले. मन्वंतरचे इगतपुरी तालुक्यात सर्वत्र कौतुक सुरु असून लवकरच त्याच्या दमदार पहाडी आवाजातील कार्यक्रमांचा सर्वांना आस्वाद घेता येणार आहे. त्याच्या यशाबद्दल इगतपुरी तालुक्यात त्याचे अभिनंदन सुरु आहे. संस्कृती रक्षणासाठी सरसावलेल्या जाधव परिवाराने मन्वंतरच्या यशाबद्दल जल्लोष व्यक्त केला आहे. सकल मराठा समाजाचे तालुकाध्यक्ष नारायण जाधव यांनी मन्वंतरचा अभिमान वाटत असल्याचे सांगत जाधव परिवाराला आनंददायी काम केले असल्याचे कौतुक केले.
बदललेल्या काळामध्ये शाळांमध्ये होणारे स्नेहसंमेलन, सांस्कृतिक कार्यक्रम आणि गाण्यांच्या स्पर्धेमध्ये संस्कृती जपणाऱ्या गोष्टींचा अभाव आहे. पाश्चात्य संस्कृतीच्या कार्यक्रमांमुळे नितिमूल्ये धोक्यात आली आहेत. याचा दुष्परिणाम नव्या पिढीला भोगावा लागणार आहे. या परिस्थितीत शाळेतील सांस्कृतिक कार्यक्रमामध्ये सहभागी व्हायचे असेल तर समाजाला दिशा देणाऱ्या गाण्याचे किंवा कलेचे सादरीकरण व्हावे अशी अपेक्षा मन्वंतरचे वडील बाळासाहेब हरिभाऊ जाधव आणि आई विद्या तथा मनीषा बाळासाहेब जाधव यांची होती. त्यानुसार मन्वंतर यांने आईवडिलांचे मार्गदर्शन, आजी लंकाबाई लक्ष्मण नाठे यांच्या सहकार्याने शाळेतील कार्यक्रमासाठी पोवाड्याची तयारी केली. तयारी करतांना आईवडील, आजी, बहीण प्रज्ञा, चिमुकला भाऊ योगी यांना प्रेक्षक म्हणून समोर बसवत पोवाड्याची सर्वोत्तम तयारी केली. शाळेत त्याचा पोवाडा सर्वांना मनापासून भावला. त्यानंतर जाधव परिवाराने त्याला लागलेल्या पोवाडे गायनाच्या छंदाचे जतन केले.
दमदार आवाज, लयदार सादरीकरण, उत्तम पाठांतर करून मन्वंतर तयारी करीत असला तरी त्याला सुयोग्य व्यासपीठ मिळत नव्हते. अशावेळी महाराष्ट्र राज्य सांस्कृतिक कार्य संचालनालयातर्फे वाघेरे येथे आनंदतरंग फाउंडेशनतर्फे शाहिरी प्रशिक्षण शिबिराचे आयोजन शाहीर उत्तम गायकर यांनी केले. हे समजताच जाधव परिवाराने मन्वंतरला शिबिरात पाठवण्याचे निश्चित केले. त्याच्यासाठी वयोवृद्ध आजी लंकाबाई लक्ष्मण नाठे यांनी संपूर्ण दहा दिवस स्वतः हजर राहून कष्ट घेतले. ह्या शिबिरात १२ वर्ष वयाचा एकमेव शाहीर फक्त मन्वंतर हाच आलेला होता. मन लावून त्याने शिबिराचा फायदा घेऊन स्वतःतील कला अधिकाधिक विकसित केली. शिबिराच्या निमित्ताने इगतपुरी तालुक्यातील १२ वर्ष वयाचा पहिला शाहीर होण्याचा बहुमान मन्वंतर जाधव याने पटकावला. महाराष्ट्र शासनाची राजमान्य शाहीर पदवी मिळवून त्याने तालुक्याचे नाव उंचावलेले आहे. लवकरच त्याचे कार्यक्रम इगतपुरी तालुकाभर सुरु होणार आहेत.