इगतपुरीनामा न्यूज – भारत निवडणूक आयोगाच्या निर्देशानुसार विशेष मतदार पुनरीक्षण-२०२६ अंतर्गत १२७-इगतपुरी (अ.ज.) विधानसभा मतदारसंघात मतदार यादी अद्ययावत करण्याची प्रक्रिया वेगाने सुरू आहे. या पार्श्वभूमीवर, ज्या नागरिकांची नावे अद्याप मतदार यादीत समाविष्ट झालेली नाहीत, अशा पात्र नागरिकांसाठी शनिवार दि. १० आणि रविवार दि. ११ ऑक्टोबर २०२६ रोजी विशेष मतदार नोंदणी शिबिराचे आयोजन करण्यात आले आहे. लोकशाहीच्या या पवित्र उत्सवात जास्तीत जास्त नागरिकांनी सक्रिय सहभाग नोंदवून आपले नाव मतदार यादीत नोंदवावे, असे आवाहन इगतपुरीचे सहा. मतदार नोंदणी अधिकारी तथा तहसीलदार अभिजीत बारवकर, निवडणूक नायब तहसीलदार वर्षा वाघ यांनी केले आहे.
१० आणि ११ ऑक्टोबर २०२६ रोजी मतदारसंघातील संबंधित सर्व मतदान केंद्रांवर हे शिबिर होईल. ज्या नागरिकांनी १ ऑक्टोबर २०२६ रोजी १८ वर्षे पूर्ण केली आहेत आणि ज्यांचे नाव मतदार यादीत नाही, ते या शिबिरात अर्ज करू शकतात. अर्ज सादर करण्याची अंतिम तारीख १२ ऑक्टोबर २०२६ आहे. पात्र नागरिकांनी प्रत्यक्ष मतदान केंद्रावर जाऊन BLO (मतदान केंद्रस्तरीय अधिकारी) यांच्याकडे पुरावा व घोषणापत्रासह नमुना क्र. ६ (Form-6) भरून नवीन मतदार म्हणून नोंदणी करावी. मतदार यादीतील नाव, पत्ता किंवा इतर तपशिलामध्ये दुरुस्ती करायची असल्यास, त्यासाठीही संबंधित अर्ज सादर करता येणार आहे. ज्या नागरिकांना ऑनलाइन नोंदणी करायची आहे, ते voters.eci.gov.in या संकेतस्थळावर किंवा ECINET मोबाईल अ‍ॅपच्या माध्यमातून अर्ज करू शकतात.