इगतपुरीनामा न्यूज – डॉ. श्री. नानासाहेब धर्माधिकारी प्रतिष्ठान रेवदंडा यांच्या सौजन्याने आज देशभरात जिल्हा तालुका स्तरावरील सरकारी कार्यालयांच्या आवारासह प्रमुख रस्त्यांची साफसफाई करण्यासाठी स्वच्छता अभियान आयोजित करण्यात आले होते. पंतप्रधान नरेंद्र मोदी यांनी सुरु केलेल्या स्वच्छ भारत अभियान मोहिमेचे स्वच्छतादूत म्हणून राज्यपालांनी डॉ. श्री. नानासाहेब धर्माधिकारी प्रतिष्ठानचे अध्यक्ष डॉ. श्री. आप्पासाहेब धर्माधिकारी यांची नियुक्ती केली आहे. त्यांच्या मार्गदर्शनाखाली स्वच्छता मोहीम राबवण्यात आली. डॉ. श्री. नानासाहेब धर्माधिकारी प्रतिष्ठानच्या सौजन्याने गेली अनेक वर्षे व्यापक स्वरूपात स्वच्छता अभियान राबविण्यात येत आहे. १६ नोव्हेंबर २०१४ रोजीच्या स्वच्छता अभियानाची नोंद लिम्का बुक ऑफ रेकॉर्डमध्ये करण्यात आली आहे. प्रतिष्ठानतर्फे डॉ. श्री. नानासाहेब धर्माधिकारी यांच्या जन्मशताब्दी वर्षानिमित श्री सदस्यांकडून शहरातील सर्व कार्यालयांची आवारे व प्रमुख रस्ते स्वच्छ करण्यात आले. ह्या मोहिमेत सुमारे ३.५ टन कचरा इगतपुरी नगर परिषदेच्या मदतीने डम्पिंग ग्राउंड पर्यंत पोहोचवण्यात आला. ह्या मोहिमेत ५ एकर क्षेत्रफळ परिसर स्वच्छ करण्यात आला, तहसील कार्यालय, पंचायत समिती, पोलीस स्टेशन आदी सरकारी कार्यालयांची स्वच्छता करण्यात आली. ह्या अभियानात शहर व तालुक्यातील ८५ श्रीसदस्यांनी सहभाग नोंदवला. संपूर्ण अभियानात प्रशासनाच्या सहकार्याने परंतु कोणताही अतिरिक्त बोजा पडणार नाही याची दक्षता घेण्यात आली. हातमौजे, झाडू, मास्क, कचरा उचलण्याचे साहित्य प्रतिष्ठानतर्फे पुरवण्यात आले. प्रतिष्ठानची स्वच्छता मोहीम कौतुकास्पद असल्याचे मत अधिकाऱ्यांनी यावेळी व्यक्त केले.
