संबंधित शेतकऱ्यांनी बँक तपशील सादर न केल्यास रक्कम शासनजमा होणार – तहसीलदार परमेश्वर कासुळे
इगतपुरीनामा न्यूज, दि. ६
इगतपुरी तालुक्यात २०२० मध्ये झालेल्या अतिवृष्टीमुळे बाधित झालेल्या नुकसानग्रस्त शेतकऱ्यांना नुकसानीची भरपाई वाटप करण्यासाठी शासनाकडून निधी प्राप्त झालेला आहे. मात्र इगतपुरी तालुक्यातील अनेक शेतकऱ्यांचे बँक खाते बंद असून अनेकांच्या खात्यांचा तपशील चुकलेला आहे। त्यामुळे नुकसान भरपाईची रक्कम शेतकऱ्यांच्या खात्यावर वर्ग करण्यासाठी अडचणी आलेल्या आहेत. संबंधित शेतकऱ्यांची यादी गावातील तलाठी कार्यालयात उपलब्ध असून संबंधित शेतकऱ्यांनी ११ जानेवारीच्या आत दुरुस्त अथवा नव्या बँक खात्याचा तपशील सादर करणे आवश्यक आहे. मुदतीमध्ये शेतकऱ्यांनी खाते तपशील सादर न केल्यास नुकसानीची रक्कम शासनाकडे परत पाठवण्यात येणार आहे. ही रक्कम मिळण्यासाठी त्यांनतर कोणाला दावा करता येणार नाही. म्हणून तातडीने संबंधित शेतकऱ्यांनी तलाठी कार्यालयात संपर्क साधून दुरुस्त अथवा नव्या बँक खात्याचा तपशील सादर करावा असे आवाहन इगतपुरीचे तहसीलदार परमेश्वर कासुळे यांनी प्रसिद्धी पत्रकाद्वारे केले आहे.
राज्यात जुन ऑक्टोबर २०२० या कालावधीमध्ये झालेल्या अतिवृष्टीमुळे इगतपुरी तालुक्यातील शेतीपिकांचे व बहुवार्षिक पिकांचे मोठ्या प्रमाणावर नुकसान झालेले आहे. ह्या आपत्तीमुळे शेती पिकांचे व बहुवार्षिक पिकांचे नुकसान झालेल्या आपदग्रस्त शेतकऱ्यांना शासनामार्फत विशेष दराने मदत व सवलत देण्याचा निर्णय शासनाने घेतलेला आहे. इगतपुरी तालुक्यातील एकुण लागवड क्षेत्रापेकी १६२०८.०९ हे. आर क्षेत्रावर पिकांचे नुकसान झालेले आहे. याचा एकुण ३२ हजार ७०६ शेतकऱ्यांना नुकसानीचा फटका बसलेला आहे. सर्व आपदग्रस्त शेतकऱ्यांना नुकसान सहाय्यता निधी वाटपासाठी ११ कोटी ८९ लाख ८० हजार रुपये प्राप्त झालेले असुन ही रक्कम आपदग्रस्त शेतकऱ्यांच्या बँक खात्यावर जमा करण्यात येत आहे. परंतु बहुतांशी लाभार्थी यांनी दिलेले बँक खाते बंद असून बँक तपशिलामधील चुक या कारणांमुळे लाभार्थ्यांना देय असलेले अनुदान बँकेमध्ये पाठवुनही नुकसानीची रक्कम लाभार्थी यांच्या बँक खात्यावर जमा झालेली नाही. इगतपुरी तालुक्यामधील अशा सर्व व्यक्तींची यादी ऑक्टोबर २०२१ मध्ये गावोगावी प्रसिध्द करण्यात आलेली होती. परंतु संबंधित लाभार्थी यांनी दुरुस्त केलेले बँक खाते तपशिल सादर न केल्साने अद्याप पर्यंत देय अनुदान रक्कम कार्यालयाच्या बँक खाती अखर्चित स्वरुपात दिसुन येत
आहे. सर्व नागरीकांना आवाहन करण्यात येते की, तातडीने दुरुस्त बँक खात्याचा तपशिल सादर करण्यासाठी अंतिम मुदत ११ जानेवारी पर्यंत असून या कालावधीत गावोगावी तलाठी यांचेमार्फत अशा सर्व लाभार्थ्यांची यादी प्रसिध्द करण्यात आलेली आहे. तरी संबंधित शेतकऱ्यांनी ११ जानेवारी पर्यंत दुरस्त बँक तपशिल तलाठी यांच्याकडे जमा करावेत. अन्यथा अखर्चित रक्कम शासन जमा करण्यासाठी कार्यवाही करण्यात येईल. ही रक्कम शासन जमा झालेनंतर पुनःश्च मागणी करता येणार नाही. याची सर्वस्वी जबाबदारी ही संबंधित लाभार्थी यांची राहील असेही तहसीलदार परमेश्वर कासुळे यांनी प्रसिद्धीपत्रकात म्हटले आहे.