इगतपुरीनामा न्यूज, दि. १
शरद जोशी प्रणीत इगतपुरी तालुका शेतकरी संघटनेच्या वतीने इगतपुरीचे तहसीलदार परमेश्वर कासुळे यांना निवेदन देण्यात आले. निवेदनामध्ये शेतकऱ्यांसाठी विविध मागण्या करण्यात आल्या आहेत. मागण्या मान्य न झाल्यास इगतपुरी तालुक्यात तीव्र आंदोलन करण्यात येईल असा इशारा देण्यात आला आहे.
निवेदनात नमूद आहे की इगतपुरी तालुक्यातील बऱ्याच शेतकऱ्यांच्या जमीनीमध्ये हाय टेन्शन टॉवर व पॉवरचे पोल बऱ्याच वर्षांपासून उभे करण्यात आलेले आहे. त्यामुळे शेतकऱ्यांच्या मशागतीला अडचणी येत आहे. शेतजमिनीचे मूल्यांकन कमी झाले आहे. पिके घेण्यास अडथळा निर्माण झाला आहे. म्हणून वीज मंडळाने ज्या शेतकऱ्यांच्या जमीनीमध्ये हाय टेन्शन टॉवर उभे केलेले आहेत त्या शेतकऱ्यांना शासकीय नियमाप्रमाणे भाडेपट्टा द्यावा. त्या प्रकल्पग्रस्त शेतकऱ्यांना प्रकल्पग्रस्त दाखला देऊन नोकरीत घ्यावे. ज्या शेतकऱ्यांची जमीन पॉवर हाउस साठी अधिग्रहण झाली आहे अशा शेतकऱ्यांच्या पाल्यास त्वरित प्रकल्पग्रस्त दाखला द्यावा. त्यांना वीज मंडळात कामावर घेण्यात यावे. या मागण्यांवर विचार न झाल्यास शेतकरी संघटनेच्या वतीने इगतपुरी तालुक्यात तीव्र आंदोलन करण्यात येईल असा इशारा देण्यात आला.
याप्रसंगी शेतकरी संघटनेचे तालुकाध्यक्ष किसन शिंदे, उत्तर महाराष्ट्र संपर्कप्रमुख बाळासाहेब धुमाळ, जिल्हा उपाध्यक्ष तानाजी झाडे, तालुका संपर्कप्रमुख रामदास गायकर, आदिवासी सेलचे अध्यक्ष पांडुरंग शेंडे, तालुका उपाध्यक्ष अरुण जुंद्रे, तालुका संघटक रामनाथ जाधव, सोपान टोचे, भाऊसाहेब गायकर आदी आदी उपस्थित होते.
