इगतपुरीनामा न्यूज – इगतपुरी तालुक्यातील खडकेद ग्रामपंचायतीवर वाचनालय साहित्याच्या निधीबाबत गंभीर आरोप करण्यात आले आहेत. शासकीय व निमशासकीय कर्मचाऱ्यांच्या वर्गणीतून सुरू असलेल्या वाचनालयासाठी साहित्य खरेदीच्या नावाखाली ग्रामपंचायतीकडून निधीचा गैरवापर झाल्याचा आरोप करण्यात आला आहे. गावातील कर्मचारी आणि ग्रामस्थांनी प्रत्येकी हजार रुपये वर्गणी जमा करून वाचनालय चालू ठेवण्याचा उपक्रम राबवला होता. मात्र याच्या आडून ग्रामपंचायतीने वाचनालयासाठी दाखवलेले साहित्य केवळ कागदोपत्री असल्याचा संशय आहे. याबाबत हर्षदा गणेश भांडकोळी, भगवान खाडे, करण भांडकोळी, तुषार भांडकोळी, जालिंदर भांडकोळी, दीपक भांडकोळी यांनी इगतपुरीचे गटविकास अधिकारी महेश वळवी यांच्याकडे लेखी तक्रार केली आहे. याबाबत चौकशी करून संबंधितांवर कठोर कारवाई करण्याची मागणी करण्यात आली आहे.
मिळालेल्या माहितीनुसार, वाचनालयासाठी साहित्य यादी, कपाट, दहा खुर्च्या, तीन फॅन आणि एक HP कंपनीचा प्रिंटर अशी खरेदी दाखवण्यात आली आहे. परंतु प्रत्यक्ष जागेवर हे साहित्य उपलब्ध आहे का, याबाबत प्रश्न निर्माण झाले आहेत. त्यामुळे ग्रामपंचायतीने केवळ बिलं, यादी आणि नोंदी दाखवून निधी लाटल्याचा आरोप स्थानिक पातळीवर जोर धरू लागला आहे. गावातील कर्मचारी आणि वाचनालय चालवणाऱ्यांनी याबाबत सखोल चौकशीची मागणी केली असून, संबंधित साहित्य प्रत्यक्ष खरेदी झाले आहे की नाही, हे तपासण्यासाठी पंचनामा, बिल तपासणी, पुरवठादारांची पडताळणी आणि प्रत्यक्ष पाहणी होणे आवश्यक असल्याचे सांगितले जात आहे. या प्रकरणामुळे गावातील ग्रामपंचायत कारभार, पारदर्शकता आणि सार्वजनिक निधीच्या वापराबाबत गंभीर प्रश्न निर्माण झाले आहेत. वाचनालयाच्या नावाने निधी उचलला गेला असेल आणि साहित्य प्रत्यक्षात मिळालेच नसेल, तर ही बाब केवळ आर्थिक अनियमितता नसून विश्वासघात असल्याचे मानले जात आहे. त्यामुळे या प्रकरणाची तातडीने चौकशी करून दोषींवर कारवाई करण्याची मागणी केली आहे.
