इगतपुरीनामा न्यूज – इगतपुरी तालुक्यातील घोटी पोलीस ठाण्याच्या हद्दीतील सातूर्ली परिसरात भीषण अपघाताची घटना घडली आहे. एका भरधाव चारचाकी वाहनाने दोन दुचाकींना जोरदार धडक दिल्याने एकूण ८ जण जखमी झाल्याची प्राथमिक माहिती समोर आली आहे. मिळालेल्या माहितीनुसार, चारचाकी वाहन चालकाचे वाहनावरील नियंत्रण सुटल्याने त्याने २ दुचाकींना जोरदार धडक दिली. धडकेची तीव्रता इतकी होती की, दुचाकीवरील प्रवासी काही अंतरावर फेकले गेल्याची माहिती प्रत्यक्षदर्शींनी दिली आहे. अपघाताच्या स्वरूपावरून चारचाकी चालकाने मद्यपान केले असावे, अशी शक्यता व्यक्त केली जात आहे. मात्र याबाबत अधिकृत दुजोरा मिळालेला नाही. या अपघातात दोन दुचाकींवरील चार जण जखमी झाले असून चारचाकी वाहनातील चौघेजण देखील जखमी झाल्याचे समजते. अपघाताची माहिती मिळताच स्थानिक नागरिक व पोलिसांनी तातडीने घटनास्थळी धाव घेत मदतकार्य सुरू केले. सर्व आठही जखमींना उपचारासाठी घोटी येथील ग्रामीण रुग्णालयात दाखल करण्यात आले असून त्यांच्यावर वैद्यकीय उपचार सुरू आहेत. जखमींची ओळख आणि अपघाताचे नेमके कारण अद्याप समोर आलेले नाही. घोटी पोलीस या प्रकरणाचा अधिक तपास करत असून चालकाने मद्यपान केले होते का, याबाबतही चौकशी सुरू आहे. या घटनेमुळे परिसरात खळबळ उडाली आहे. व्हिडीओ बातमी पहा https://www.facebook.com/share/v/1GFNCAKqEa/
