इगतपुरीनामा न्यूज – इगतपुरी तालुक्यातील खेड भैरव शिवारात अवैध हातभट्टी दारू निर्मिती करणाऱ्यांविरोधात राज्य उत्पादन शुल्क विभागाच्या ड विभागाच्या पथकाने मोठी कारवाई केली. ह्या धडक कारवाईत त्यांनी दारूच्या भट्ट्या उद्ध्वस्त केल्या. याप्रकरणी दोन आरोपींना ताब्यात घेतले असून ५० हजार रुपये किमतीचा मुद्देमाल नष्ट करण्यात आला. विभागीय उपआयुक्त श्रीमती वर्मा, अधीक्षक संतोष झगडे यांच्या मार्गदर्शनाखाली ड विभागाचे निरीक्षक श्री. गोसावी यांच्या नेतृत्वाखालील पथकाने खेड भैरव परिसरात छापा टाकून अवैध दारू निर्मितीचा पर्दाफाश केला. या कारवाईत १ हजार २०० लिटर घातक रसायनयुक्त मिश्रण व हातभट्टी दारू नष्ट करण्यात आली. या ठिकाणी सुरू असलेल्या दारूच्या भट्ट्याही उध्वस्त करण्यात आल्या. या प्रकरणी दोन जणांविरोधात गुन्हा दाखल करण्यात आला असून पुढील कायदेशीर कारवाई सुरू आहे. अवैध हातभट्टी दारूविरोधातील या कारवाईमुळे दारू माफियांमध्ये खळबळ उडाली असून, नागरिकांच्या आरोग्याच्या दृष्टीने ही महत्त्वाची कारवाई मानली जात आहे. आपल्या भागात कुठेही अवैध दारूनिर्मिती, साठा, विक्री अथवा वाहतूक होत असल्याचे आढळल्यास तात्काळ राज्य उत्पादन शुल्क विभागाला माहिती द्यावी, असे आवाहन करण्यात आले आहे. माहिती देणाऱ्यांची ओळख पूर्णपणे गोपनीय ठेवून संबंधितांवर कठोर कारवाई केली जाईल, असे सांगण्यात आले.
