इगतपुरीनामा न्यूज – वाळविहीर ( कऱ्होळे ) फाटा परिसरात खुर्ची विक्रेत्याला मारहाण करून लुटणाऱ्या तीन आरोपींना घोटी पोलिसांनी अवघ्या ३० मिनिटांच्या आत बेड्या ठोकल्या आहेत. या धाडसी कारवाईमुळे परिसरात घोटी पोलिसांच्या तत्परतेचे कौतुक होत आहे. मिळालेल्या माहितीनुसार, फिर्यादी राजेश मांगिलाल बंजारा, वय ४२, रा. ओमबाबानगर, घोटी हे १० जून २०२६ ला दुपारी वाळविहीर फाटा परिसरात प्लास्टिक खुर्च्या विक्रीसाठी फिरत होते. यावेळी तीन अज्ञात इसमांनी त्यांना “ओ खुर्सी वाले भैय्या” अशी हाक मारून थांबवले. ते जवळ जाताच या आरोपींनी त्यांना पकडले आणि लोखंडी गजाने मारहाण करत जखमी केले. त्यानंतर आरोपींनी फिर्यादीची ८० हजार रुपये किमतीची मोटारसायकल, ८ हजार ८०० रुपये किमतीच्या ११ प्लास्टिक खुर्च्या आणि ५०० रुपये रोख रक्कम असा एकूण ८९ हजार ३०० रुपयांचा मुद्देमाल बळजबरीने हिसकावून नेला होता. घटनेचे गांभीर्य लक्षात घेता, घोटी पोलीस ठाण्यात भारतीय न्याय संहिता कलम ३०९(६), ३(५) अन्वये गुन्हा दाखल करण्यात आला. पोलीस निरीक्षक विजय शिंदे यांनी तत्काळ दोन विशेष पथके तैनात केली. नाशिक ग्रामीणचे पोलीस अधीक्षक डॉ. श्री स्वामी यांच्या मार्गदर्शनाखाली पोलिसांनी परिसरात शोधमोहीम राबवली. पोलीस पथकाने अवघ्या ३० मिनिटांच्या आत संशयित आरोपी गुलाब गणपत कावळे, वय २५, जीवन काळू शिंदे, वय २८, विलास लक्ष्मण ठाकरे, वय २५, सर्व रा. वाळविहीर, ता. इगतपुरी जि. नाशिक ह्या आरोपींचा शोध घेत त्यांना मुद्देमालासह ताब्यात घेतले. या कामगिरीत पोलीस हवालदार सागर सौदागर, दीपक सांगळे, बाळासाहेब आहेर, श्रीकांत खैरे आणि पोलीस कॉन्स्टेबल पोपट वाघ यांनी महत्त्वाची भूमिका बजावली. ह्या गुन्ह्याची नोंद पोलीस हवालदार इंगळे यांनी केली असून, पुढील तपास पोलीस उपनिरीक्षक प्रविण उदे करत आहेत. घोटी पोलिसांच्या या वेगवान कारवाईमुळे गुन्हेगारांचे धाबे दणाणले असून, नागरिकांनी पोलिसांचे आभार मानले आहेत.