इगतपुरीनामा न्यूज – बारा ज्योतिर्लिंगापैकी एक असलेल्या त्र्यंबकेश्वर मंदिरात जगभरातून भाविक दर्शनासाठी येतात. मंदिराच्या नियमानुसार दर्शनासाठी २०० रूपये प्रमाणे देणगी दर्शन पास सुविधा सुरू आहे. सलग सुट्ट्या असल्यावर त्र्यंबकेश्वर मंदिरात्री दर्शनासाठी भाविकांची मोठी गर्दी पहायला मिळते, गर्दी असल्यावर भाविकांना रांगेमध्ये राहुनच दर्शन करावे लागते. रांगेत उभे राहण्याऐवजी पैसे देऊन लगेच दर्शन करून देण्याचे आमिष दाखविणाऱ्या इसमांविरुध्द प्रधान सत्र न्यायाधीश नाशिक यांच्याकडे तक्रारी प्राप्त झाल्या होत्या. त्यांच्या सुचनांप्रमाणे त्र्यंबकेश्वर पोलिसांनी दर्शनासाठी भाविकांची फसवणूक करणाऱ्या २ भामट्यांवर गुन्हा दाखल केला आहे. त्र्यंबकेश्वरचे पोलीस निरीक्षक महेश कुलकर्णी, सपोनि राजेश गावित यांच्या मार्गदर्शनाखाली हवालदार सचिन जाधव, सचिन गांगुर्डे, श्रावण साळवे, अमोल बोराडे, नंदु मुसळे, अंकुश भोईर यांनी ही कामगिरी केली. कोणीही जास्त पैसे घेवुन दर्शनाचे आमिष दाखवत असेल तर त्र्यंबकेश्वर पोलीस ठाणे अथवा त्र्यंबकेश्वर मंदिर ट्रस्टशी संपर्क करावा. कोणीही भाविकांनी प्रलोभनास बळी पडू नये असे आवाहन करण्यात आले आहे.
शनिवारी पंचवटी नाशिकचे २ भाविक २०० रूपयाचा दर्शन पास घेऊन रांगेत उभे होते. त्यांना एका संशयिताने मी तुम्हाला १० मिनिटात दर्शन करून देतो. तुम्ही घेतलेल्या पास दर्शनासाठी चार पाच तास वेळ लागेल. मी तुम्हाला ३ हजार रूपयात व्हीआयपी दर्शन करून देतो असे सांगितले. संशयिताने त्याच्या साथीदारासह यातील भाविकांना मंदिराचे आत प्रवेश देवुन दर्शन करून मंदिराचे बाहेर येतात त्यांच्या कडून व्हीआयपी दर्शनाचे ३ हजार रुपये रोख स्वरूपात घेतले. त्र्यंबकेश्वर मंदिर देवस्थान ट्रस्टचे कोणतीही अधिकृत फि आकारण्याबाबत कुठलीही सुविधा नसतांना, त्याबाबत भाविकांना कोणतीही पावती न देता त्यांची फसवणुक केली. म्हणून संशयित १) गोटीराम मनाजी पेहरे, वय ४१, रा. खडकवाडी, ता. त्र्यंबकेश्वर, २) अभिषेक कडलग, रा. त्र्यंबकेश्वर (फरार) यांच्याविरूध्द त्र्यंबकेश्वर पोलीस ठाण्यात कलम ३१८ (४), ३(५) प्रमाणे गुन्हा दाखल करण्यात आला आहे. यातील आरोपी क्र. १ याला अटक करण्यात आली आहे.