इगतपुरीनामा न्यूज – हॅपी स्कूल प्रकल्प अंतर्गत IWCBN यांच्या वतीने इगतपुरी तालुक्यातील वाघ्याचीवाडी शाळेतील विद्यार्थ्यांसाठी वार्षिक आरोग्य तपासणी शिबिराचे यशस्वी आयोजन करण्यात आले. विद्यार्थ्यांमध्ये आरोग्यविषयक जाणीव निर्माण करून प्रत्येकाची सर्वांगीण आरोग्याची काळजी घेण्यासाठी हा उपक्रम उपयुक्त आहे. हिवाळ्याचा विचार करून शाळेतील सर्व विद्यार्थी, शिक्षकांना ब्लॅंकेट वाटप करून उबदारपणा व दिलासा देण्यात आला. IWCBN च्या अध्यक्षा सौ. चाहना गांधी यांनी तंबाखूचा कोणत्याही स्वरूपात होणारा अपाय याविषयी मार्गदर्शन केले. कर्करोगाविषयी जनजागृती करत आरोग्य रक्षणाचे महत्त्व अधोरेखित केले. प्रतिभा दोशी यांनी संतुलित आहार व योग्य आहार सवयी यावर संवादात्मक पद्धतीने मार्गदर्शन केले. स्थानिक व सहज उपलब्ध असलेल्या पौष्टिक अन्नपदार्थांचा आहारात समावेश करण्यावर विशेष भर दिला. कार्यक्रम अधिक आनंददायी करण्यासाठी IWCBN च्या वतीने विद्यार्थ्यांना फळे व लाडूंचे वाटप करण्यात आले. विद्यार्थ्यांच्या चेहऱ्यावर दिसणारा आनंद, उत्साह व समाधान हेच हॅपी स्कूल प्रकल्पाच्या यशाचे खरे प्रतीक ठरले. अध्यक्षा चाहना गांधी, उपाध्यक्षा जयश्री लाखोटिया, मानद सचिव डॉ. विद्या मुकुंद, प्रगती अजमेरा, प्रतिभा दोशी, साधना दोशी, संयुक्ता दोशी उपस्थित होते. या स्तुत्य उपक्रमासाठी सहकार्य करणाऱ्या सर्वांचे वाघ्याचीवाडी जिल्हा परिषद शाळा व ग्रामस्थांनी आभार मानले.
