इगतपुरीनामा न्यूज – आज इगतपुरी शहरात २ दहशतवादी पकडण्यात पोलिसांना यश आले. यासह बॉम्बशोधक पथक व श्वान पथकाने बॉम्ब शोधून निकामी केले. तंतोतंत खरीखुरी वाटणारी ही कारवाई पोलीस प्रशासनाचा मॉकड्रिल असल्याचे समजतातच इगतपुरीकर नागरिकांनी सुटकेचा नि:श्वास सोडला. काही दिवसांवर आलेल्या भारतीय स्वातंत्र्य दिनाच्या पार्श्वभूमीवर इगतपुरी रेल्वे स्थानक व परिसरात या मॉक ड्रिलचा थरार रंगला होता. उद्भवणाऱ्या कोणत्याही आपत्ती जनक स्थितीला सामोरे जाण्यासाठी आज हे मॉकड्रिल घेण्यात आले. या मॉक ड्रिलमध्ये क्यूआरटी पथकाने आतंकवाद्यांना अटक केली.बॉम्ब शोधक पथक व श्वान पथकाने परिसराची तपासणी केली. तब्बल तासभर चाललेल्या या मॉक ड्रिलमध्ये प्लॅटफॉर्म क्रमांक दोन निर्मनुष्य करण्यात आले होते. लोहमार्ग पोलीस ठाणे, इगतपुरी पोलीस ठाणे, आरपीएफ, क्यूआरटी पथक, बॉम्बशोधक पथक, आतंकवाद विरोधी पथक श्वान पथक, अग्निशमन दल, ग्रामीण रुग्णालयाचे अधिकारी व कर्मचाऱ्यांनी सहभाग नोंदवला. कोणत्याही संकटाला सामोरे जाण्यासाठी पोलिसांसह संपूर्णपणे सक्षम आणि डोळ्यात तेल घालून जागे असल्याचे हे प्रात्यक्षिक नागरिकांनी अनुभवले. जागरूक नागरिकांनी प्रशासनाच्या सज्जतेचे कौतुक करून अभिमान व्यक्त केला आहे.
