इगतपुरीनामा न्यूज – जिल्हा परिषदेचा खातेप्रमुख महिला अधिकारी व कर्मचाऱ्यांचा लैंगिक छळ करत होता. महिलांना अश्लिल मेसेज, शरीर सुखाची मागणी अशा आशयाच्या बातम्या गेल्या आठवड्याभरापासून विविध माध्यमाद्वारे आल्या आहेत. एवढे होऊनही संबंधित अधिकार्यावर अद्याप कारवाई झालेली नाही. चौकशीच्या नावाखाली नेमलेली समिती वेळ मारून नेत आहे. या अधिकाऱ्यावर तातडीने कारवाई करून त्यांच्यावर गुन्हा दाखल करावा अशी मागणी जिजाऊ ब्रिगेडने जिल्हा परिषदेच्या मुख्य कार्यकारी अधिकारी असिमा मित्तल यांच्याकडे केली आहे. माँ जिजाऊ, छत्रपती शिवराय, फुले, आंबेडकरांचा पुरोगामी महाराष्ट्रात महिलांवर अत्याचार करणाऱ्या नराधमांचे हात पाय कलम केलेले आहेत. या घटनेमुळे जिल्हा परिषदेसह जिल्ह्याची मोठी बदनामी यामुळे झालेली आहे. या प्रकरणात संबंधित दोषीवर शिक्षा झाली पाहिजे. यामध्ये प्रशासनाने गंभीर लक्ष घालून सत्वर कारवाई न केल्यास जिजाऊ ब्रिगेडच्या सर्व महिला संबंधित अधिकाऱ्याच्या तोंडाला काळे फासून जिजाऊ ब्रिगेड स्टाईलने उत्तर देऊ असे निवेदनात म्हटले आहे. यावेळी जिल्हाध्यक्ष स्मिता शिंदे, प्रदेश सदस्य सुमन हिरे, जिल्हा कार्याध्यक्ष वैभवी देसले, महानगरप्रमुख श्वेता देसले, योगिता सोनवणे, मनीषा नेरे यांच्यासह अनेक पदाधिकारी उपस्थित होते. यावेळी मुख्य कार्यकारी अधिकारी मित्तल यांच्याशी जिजाऊ ब्रिगेडच्या संतप्त महिलांनी चर्चा केली. यावेळी जिल्हाध्यक्ष स्मिता शिंदे, वैभवी देसले, मनीषा मेरे यांनी असिमा मित्तल यांना धारेवर धरले. जिल्हा परिषद मिनी मंत्रालय असून ह्या ठिकाणी कार्यरत महिलांची संख्या मोठी आहे. त्यामुळे या प्रकरणाची लवकरात लवकर शहानिशा करून महिलांना न्याय मिळवून द्यावा अशी मागणी करण्यात आली. निवेदनाची प्रत मुख्यमंत्री, विभागीय आयुक्त यांना पाठवण्यात आली.
या प्रकरणात अडकलेल्या सर्व पीडित महिलांनी पुढे यावे. कोणाच्याही दबावाला बळी पडू नये. जिजाऊ ब्रिगेड आपल्या संरक्षणासाठी भक्कम आहे. ज्या ज्या महिला अडकल्या असतील त्यांनी जिजाऊ ब्रिगेडशी संपर्क साधावा. - स्मिता माने शिंदे, जिल्हाध्यक्ष जिजाऊ ब्रिगेड नाशिक
