इगतपुरीनामा न्यूज – इगतपुरी तालुक्यातील महत्वाच्या असणाऱ्या टिटोली ग्रामपंचायतीच्या उपसरपंच पदाची निवडणूक आज अत्यंत खेळीमेळीच्या वातावरणात पार पडली. बिनविरोध निवडीची परंपरा ह्या गावाने कायम राखली आहे. विशेष म्हणजे तरुण चेहरा या ग्रामपंचायतीला लाभल्याने तालुक्यातुन कौतुक होत आहे. माजी सरपंच अनिल भोपे यांच्या मार्गदर्शनाखाली उपसरपंच निवड केली जाते. त्यांच्याच नेतृत्वाखाली आज झालेल्या विशेष बैठकीत उपसरपंच पदासाठी ज्योती काळू बोंडे यांचा एकमेव अर्ज विहित वेळेत आला. त्यामुळे अध्यासी अधिकारी लोकनियुक्त सरपंच कोमल दशरथ हाडप यांनी उपसरपंचपदी ज्योती काळू बोंडे यांची निवड झाल्याचे घोषित केले. या बैठकीवेळी ग्रामपंचायत सभागृहात माजी सरपंच अनिल भोपे, काजल गभाले, माया भडांगे, सदस्या लक्ष्मी गभाले, राहुल वाघ, ग्रामस्थ ज्ञानेश्वर भटाटे, काळू बोंडे, दशरथ हाडप, ग्रामसेवक महेंद्रकुमार पाटील, कर्मचारी गणेश बोंडे, प्रवीण भटाटे आदी उपस्थित होते. या निवडीचे स्वागत करून ग्रामस्थांनी अभिनंदन केले. लोकांनी भरभरून आशीर्वाद दिल्यामुळे उपसरपंच होता आले. या पदाच्या माध्यमातून ग्रामविकास साधण्यासाठी निरंतर तत्पर राहील. ग्रामस्थांसाठी जीवाचे रान करून चांगली कामगिरी करील असे प्रतिपादन नूतन उपसरपंच ज्योती बोंडे यांनी केले.
