इगतपुरीनामा न्यूज – इगतपुरी तालुक्यातील गोंदे एमआयडीसी परिसरात गोळीबार करून दहशत माजवणारी ५ जणांची टोळी नाशिक ग्रामीण स्थानिक गुन्हे शाखेने यशस्वीपणे जेरबंद केली आहे. वाडीवऱ्हे पोलीस ठाण्यात दाखल असलेल्या गुन्ह्याचा समांतर तपास करत असताना पोलिसांना ही मोठी यशप्राप्ती मिळाली आहे. संशयित आरोपी मारुती सुझुकी एर्टिगा वाहनाने मालेगावकडून नाशिकच्या दिशेने येणार असल्याची गुप्त माहिती एलसीबीच्या पोलिसांना मिळाली होती. त्यानुसार तातडीने सापळा रचून कारवाई करण्यात आली. पोलिसांनी आरोपींच्या ताब्यातून १ गावठी कट्टा, २ चॉपर आणि गुन्ह्यात वापरलेली १ मोटरसायकल हस्तगत केली आहे. मयूर मोहन जाधव, करण सोपान आवारे, ओंकार शरद भोसले, रोशन धोंगडे, एक विधी संघर्षग्रस्त बालक असे ५ संशयित आरोपी आहेत. वाडीवऱ्हे पोलीस ठाण्यात गुन्हा रजिस्टर क्रमांक २८३/२०२६ नुसार BNS कलम ११८(१), ३५१(२) आणि आर्म ॲक्ट अंतर्गत गुन्हा दाखल करण्यात आला होता. या गुन्ह्याचा समांतर तपास सुरू असतानाच आरोपींनी गुन्ह्याची कबुली दिल्याची माहिती पोलिसांनी दिली आहे. ही यशस्वी कारवाई नाशिक ग्रामीणचे पोलीस अधीक्षक डी. एस. स्वामी व अपर पोलीस अधीक्षक श्रीमती विमला यांच्या मार्गदर्शनाखाली स्थानिक गुन्हे शाखेचे पोलीस निरीक्षक योगेश म्हस्के, दत्तात्रय शिंदे, राहुल मोरे आणि पोलीस उपनिरीक्षक सुदर्शन बोडके यांच्या पथकातील पोलीस हवालदार प्रविण काकड, संदीप नागपुरे, हेमंत गिलबिले, सचिन धारणकर, मयूर कांगणे, दीपक गुंजाळ, सतीश घुगे, संतोष गांगुर्डे, शिवाजी ठोंबरे, प्रवीण गांगुर्डे, माधव साळे ह्या पथकाने अत्यंत वेगाने पार पाडली.
