इगतपुरीनामा न्यूज – इगतपुरी येथील दुय्यम निबंधक कार्यालय टिटोली येथील नवीन प्रशासकीय इमारतीत लवकरात लवकर स्थलांतरित करावे या प्रमुख मागणीसाठी शेतकरी संघटनेच्या वतीने येत्या २ ऑक्टोबर २०२६ रोजी इगतपुरी तहसील कार्यालयासमोर आमरण उपोषण करण्याचा इशारा देण्यात आला आहे. प्रशासनाच्या दुर्लक्षामुळे ग्रामीण भागातील शेतकरी व नागरिकांची होणारी हेळसांड थांबवण्यासाठी हा लढा पुकारण्यात आला आहे. टिटोली येथील नवीन तहसील कार्यालय आणि सध्याचे दुय्यम निबंधक कार्यालय यांच्यात १ ते ३ किलोमीटरचे अंतर आहे. आदिवासी तालुका असलेल्या इगतपुरीमधून जमिनीच्या खरेदी विक्री व इतर कामांसाठी येणाऱ्या शेतकरी आणि सर्वसामान्य नागरिकांना याचा मोठा आर्थिक व शारीरिक त्रास सहन करावा लागतो. टिटोली येथे कोट्यवधी रुपये खर्चून बांधलेली नवीन प्रशासकीय इमारत सध्या वापराविना पडून आहे. ह्या इमारतीत दुयम निबंधक कार्यालय स्थलांतर करावे अशी प्रमुख मागणी आहे.
या मागणीसाठी शेतकरी संघटनेने यापूर्वी प्रशासनाला अनेकदा निवेदने दिली आहेत. मात्र प्रशासनाकडून यावर कोणतीही कारवाई होत नसल्याचा आरोप संघटनेने केला आहे. २ ऑक्टोबरपर्यंत दुय्यम निबंधक कार्यालयाचे स्थलांतर न झाल्यास शेतकरी संघटनेचे उत्तर महाराष्ट्र संपर्क प्रमुख, अध्यक्ष, सचिव व कार्यकर्ते आमरण उपोषणाला बसणार आहेत.
कार्यालय स्थलांतरित न झाल्यास होणाऱ्या सर्व परिणामांची जबाबदारी प्रशासनाची राहील असा इशारा शेतकरी संघटनेचे उत्तर महाराष्ट्र संपर्क प्रमुख बाळासाहेब घुमाळ, तालुकाध्यक्ष किसन शिंदे आणि आदिवासी सेलचे जिल्हाध्यक्ष भागवत भगत यांनी दिला आहे.
