इगतपुरीनामा न्यूज – कृषी विभाग महाराष्ट्र शासन, पाणी फाउंडेशन आणि ‘उमेद’ यांच्या संयुक्त विद्यमाने आयोजित ‘फार्मर कप २०२६’ स्पर्धेत इगतपुरी तालुक्यातील शेनवड बुद्रुक येथील ‘संजीवनी शेतकरी गटाने’ जलसंधारणाचा एक आदर्श वस्तुपाठ घालून दिला आहे. गटाने या स्पर्धेत तब्बल १०० वनराई व दगडी बांध बनवण्याचा संकल्प सोडला असून, याच संकल्पपूर्तीचा एक भाग म्हणून आज ह्या गटाने श्रमदानातून तब्बल ३० वनराई व दगडी बांध तयार करून नाल्यातील पाणी यशस्वीरीत्या अडवले आहे. सध्या संपूर्ण जग ‘अल निनो’च्या सावटाखाली असून, महाराष्ट्रासह इगतपुरी तालुक्यातही दुष्काळजन्य परिस्थिती निर्माण झाली आहे. तालुक्यात यावर्षी सरासरीपेक्षा अत्यंत कमी पाऊस पडल्याने आणि आगामी काळातही पावसाची शक्यता धुसर झाल्याने शेतीचे मोठे संकट ओढवले आहे. मात्र, या दुष्काळासमोर गुडघे न टेकता त्यावर मात करण्याचा निर्धार संजीवनी शेतकरी गटाने केला आहे. पाण्याचा प्रत्येक थेंब जमिनीत मुरवण्यासाठी त्यांनी पावले उचलली आहेत. याच दुष्काळी परिस्थितीचा सामना करण्यासाठी गटाने आपल्या शेतात पारंपरिक पद्धतीऐवजी भाताची ‘डी.एस.आर.’ (Direct Seeded Rice – पेरणी पद्धत) पद्धतीने लागवड केली आहे. विशेष म्हणजे, कमी पाण्यात केलेली ही लागवड असूनही सध्या गटाचे भात पीक अतिशय उत्तम स्थितीत डोलत आहे. वनराई बंधारे उभारण्याच्या आजच्या महत्त्वपूर्ण कामास शासनाच्या व ग्रामस्थांच्यावतीने उत्स्फूर्त प्रतिसाद मिळाला. याप्रसंगी इगतपुरीचे तालुका कृषी अधिकारी रामदास मडके, पाणी फाउंडेशनचे उपविभागीय समन्वयक अजिंक्य गुरव, कल्याणी माळी, मेंटार शिवचरण कोकाटे, संजीवनी शेतकरी गटाचे निमंत्रक कोंडाजी गिळंदे आणि गटाचे सर्व सदस्यमोठ्या संख्येने उपस्थित होते. मान्यवरांच्या उपस्थितीने शेतकऱ्यांचा उत्साह द्विगुणित झाला होता. शेनवड बुद्रुकच्या या शेतकऱ्यांनी दाखवून दिलेली एकता आणि जलसाक्षरतेची ही चळवळ इगतपुरी तालुक्यासह संपूर्ण महाराष्ट्रासाठी एक प्रेरणादायी दिशा ठरत आहे.
