इगतपुरीनामा न्यूज : आमदार दलितमित्र डॉ. अशोकराव माने बापू यांच्या मार्गदर्शनाने रणरागिणी महिलांनी श्री स्वामी समर्थ अनुसूचित जाती सहकारी सूतगिरणी उभी केली आहे. महाराष्ट्राला अभिमान वाटेल असे हे दैदीप्यमान कार्य अत्यंत प्रेरणादायी आहे. २६ वर्षांपूर्वी लावलेले हे रोपटे आता मोठ्या वृक्षात परिवर्तीत होऊन मधुर फळे द्यायला सुरवात झाली आहे. महिलांचे सक्षम नेतृत्व म्हणून चेअरमन डॉ. नीता माने यांचा करावा तेवढा गौरव कमीच आहे. कार्यकारी संचालक सुहास राजमाने यांनी आपल्या कुशलतेने ह्या कामाला मोठे सहाय्य केलेले आहे. राज्यातील महिलांसाठी आदर्श असणाऱ्या ह्या सूतगिरणीमुळे सर्वांची मान उंचावली आहे असे प्रतिपादन हातकणंगलेचे आमदार दलितमित्र डॉ अशोकराव माने बापू यांनी केले. नाशिक जिल्ह्याच्या दुर्गम इगतपुरी तालुक्यातील उभाडे येथे श्री स्वामी समर्थ अनुसूचित जाती सहकारी सूतगिरणीच्या २६ व्या वार्षिक सर्वसाधारण सभेत ते प्रमुख पाहुणे म्हणून बोलत होते. समृद्धी महामार्ग, कनेक्टविटी, बाजारपेठ यांच्याशी संतुलन साधणारा हा प्रकल्प सुरू झाला आहे. शेकडो बेरोजगार तरुणांना, महिलांना रोजगार उपलब्ध झाला आहे. सहकारातून महिलांनी निर्माण केलेले हे काम हिमालयाच्या उत्तुंग उंचीचे असल्याचेही ते म्हणाले.
सूतगिरणी आता उत्पादनाखाली आलेली आहे. या प्रकल्पासाठी मुख्यमंत्री देवेंद्र फडणवीस, उपमुख्यमंत्री एकनाथ शिंदे, सुनेत्रा पवार, वस्त्रोद्योग मंत्री संजय सावकारे, मंत्री चंद्रकांत दादा पाटील, माजी मंत्री विनय कोरे (सावकार) यांनी व्यक्तिशः सर्वोतोपरी मदत केलेली आहे. येणाऱ्या काही दिवसात ११८ कोटीच्या प्रकल्पास मंजुरी मिळणार आहे. त्यामुळे २५ हजार चात्याचा प्रकल्प मार्च पूर्वी सुरु होईल अशी माहिती संस्थेचे संस्थापक व हातकणंगले विधानसभा मतदारसंघाचे आमदार दलितमित्र डॉ. अशोकराव माने बापू यांनी यावेळी दिली. संस्थेच्या चेअरमन डॉ. नीता अभिजित माने सभेच्या अध्यक्षस्थानी होत्या. ही सभा खेळीमेळीच्या वातावरणात पार पडली. ओएनजीसीचे अधिकारी विजय ननवरे, निवृत्त पोलीस अधीक्षक विलास भोसले, विलास जाधव, मनोहर अडसूळे, रत्नाकर गजरे, गजानन माने, राजेंद्र शिंदे यांचे मनोगत झाले. विषय पत्रिका वाचन कार्यकारी संचालक सुहास लालासाहेब राजमाने यांनी केले. यावेळी सभासदांनी हात उंचावून सर्व विषयांना एकमताने मंजुरी दिली. सभेप्रसंगी व्हाइस चेअरमन संघमित्रा गजरे, संचालिका रेखा माने, सुनीता चव्हाण, सारिका माने, अश्विनी गायकवाड, रोहिणी राजमाने, शारदा शिंदे, मंगल जाधव, जनरल मॅनेजर प्रसाद सांबारे, संतोष माने, ओंकार माने यांच्यासह महिला सभासद, हितचिंतक मोठ्या संख्येने उपस्थित होते. संस्थेच्या संचालिका रुपाली राजमाने यांनी आभार मानले.
