इगतपुरीनामा न्यूज – “महाराष्ट्र शासनाच्या महिला सक्षमीकरण कायद्यांतर्गत शेतात व शेतीपूरक व्यवसायात राबणाऱ्या महिलांना आता जमीन स्वतःच्या नावावर नसली तरी ‘शेतकरी’ घोषित करण्यात येणार आहे. आदिवासी महिलांनी या महत्त्वपूर्ण कायद्याचा आणि विविध शासकीय योजनांचा विशेषत्वाने लाभ घ्यावा,” असे आवाहन प्रकल्प संचालक (ना.दे.कृ.सं.) मीनल करनवाल यांनी केले. दिव्यांग हॉल, बारशिंगवे (ता. इगतपुरी) येथे ‘महिला सक्षमीकरण कायदा जनजागृती’ व आंतरराष्ट्रीय महिला शेतकरी वर्षानिमित्त आयोजित परिसंवाद आणि राज्यस्तरीय वेबिनार कार्यक्रमात त्या मार्गदर्शन करत होत्या.महिलांनी ऑनलाईन अर्ज करून ग्रामसभेची मान्यता घेतल्यानंतर अवघ्या १५ दिवसांत त्यांना ‘शेतकरी प्रमाणपत्र’ दिले जाणार आहे. यामुळे कष्टकरी महिलांना शासनाच्या विविध योजनांचा थेट लाभ घेणे सुलभ होईल. या विशेष मोहिमेअंतर्गत राज्यभरात वेबिनारचे आयोजन करण्यात आले होते. यात कृषी सचिव परिमल सिंह आणि ग्रामविकास विभागाचे सचिव चंद्रकांत पुलकुंडवार यांनी मार्गदर्शन करून महिला सक्षमीकरणाचे महत्त्व विषद केले. प्रकल्प संचालक मीनल करनवाल यांनी बारशिंगवे येथील आदिवासी भागात प्रत्यक्ष उपस्थित राहून महिलांशी संवाद साधला व प्रमाणपत्र वितरणाची प्रक्रिया समजावून सांगितली.
यावेळी बारशिंगवे येथील शारदाताई भागडे यांनी राज्यस्तरीय वेबिनारद्वारे थेट कृषी सचिवांसोबत संवाद साधला. वासाळी (ता. इगतपुरी) येथील आदिवासी महिला ज्योती लहांगे यांनी मोह फुलांपासून तयार केलेल्या चिक्कीची चव घेत मीनल करनवाल यांनी तिचे विशेष कौतुक केले. नानाजी देशमुख कृषी संजीवनी प्रकल्पांतर्गत (PoCRA) डीबीटी (DBT) योजनेत निवड झालेले आदिवासी शेतकरी अंकुश घाणे यांच्या शेतावर जाऊन विद्युत पंप व पीव्हीसी पाईपची पाहणी करून अधिकारी व शेतकऱ्यांना मार्गदर्शन केले. या कार्यक्रमास प्रकल्प अधिकारी कविता आंगडे, आत्माचे प्रकल्प संचालक अभिमन्यू काशीद, इगतपुरीचे तालुका कृषी अधिकारी रामदास मडके, नोडल अधिकारी माधव खैरे, मंडळ कृषी अधिकारी संजय पाटील, उप कृषी अधिकारी किशोर भरते, नानासाहेब पवार, प्रकल्प विशेषज्ञ ज्ञानेश्वर बुधवंत, ओंकार भुसारी, विकास गोफणे, हितेंद्र मोरे, सहायक कृषी अधिकारी चेतना चव्हाण, समूह सहायक स्नेहल बडाख, प्रतीक्षा मिंद आणि कृषी विभागाचे क्षेत्रीय अधिकारी उपस्थित होते. प्रास्ताविक व नियोजन सहायक कृषी अधिकारी विजय कापसे यांनी केले. बारशिंगवे परिसरातील कविता बोराडे, ज्योती भोईर, हिराबाई घाणे, लता काठे, प्रमिला घाणे, शशिकला रुपवते यांच्यासह सुमारे १२५ ते १३० महिला मोठ्या संख्येने उपस्थित होत्या. उपस्थितांनी महाराष्ट्र शासन व मीनल करनवाल यांचे आभार मानले.
