इगतपुरीनामा न्यूज – इगतपुरी शहरातील प्रभाग क्रमांक ४ मध्ये नगरसेवक भूषण जाधव यांच्या संकल्पनेतून मोफत आरोग्य शिबिराचे आयोजन करण्यात आले. महाराष्ट्र शासनाच्या आरोग्य विभागाच्या सहकार्याने तसेच सातसतक सांस्कृतिक कला क्रीडा मंडळाच्या संयुक्त विद्यमाने हे शिबिर घेण्यात आले. या आरोग्य शिबिराला परिसरातील नागरिकांनी उत्स्फूर्त प्रतिसाद देत मोठ्या संख्येने सहभाग घेतला. शिबिरात उपस्थित नागरिकांची आरोग्य तपासणी करण्यात आली. विविध आरोग्यविषयक समस्यांबाबत डॉक्टरांकडून मार्गदर्शन करण्यात आले. तपासणीनंतर आवश्यकतेनुसार रुग्णांना मोफत औषधांचे वाटप करण्यात आले. शहरातील नागरिकांना त्यांच्या परिसरातच आरोग्य तपासणी व प्राथमिक उपचाराची सुविधा उपलब्ध करून देण्याच्या उद्देशाने या शिबिराचे आयोजन करण्यात आले होते. विशेषतः आर्थिकदृष्ट्या गरजू नागरिकांसाठी अशा प्रकारच्या मोफत आरोग्य शिबिरांचा फायदा होत असल्याचे उपस्थितांनी सांगितले. नागरिकांच्या आरोग्याची काळजी घेत अशा उपक्रमाचे आयोजन केल्याबद्दल नगरसेवक भूषण जाधव यांच्या उपक्रमाचे परिसरातील नागरिकांनी स्वागत केले. भविष्यातही नागरिकांच्या गरजेनुसार आरोग्यविषयक उपक्रम राबविण्यात यावेत, अशी अपेक्षा यावेळी व्यक्त करण्यात आली.