इगतपुरीनामा न्यूज – आदिवासी ठाकूर-ठाकर समाज उन्नती मंडळाच्या इगतपुरी तालुकाध्यक्षपदी हरिश्चंद्र रघुनाथ भले यांची नाशिक जिल्हाध्यक्ष संजय लोते यांच्या नेतृत्वाखाली निवड करण्यात आली. त्यांच्या निवडीबद्धल घोटी येथे समाजातील प्रतिष्ठित मान्यवर व सामाजिक कार्यकर्त्यांच्या उपस्थितीत त्यांचा उत्साहपूर्ण सत्कार करण्यात आला. यावेळी उपस्थित मान्यवरांनी हरिश्चंद्र भले यांच्या सामाजिक कार्याचा गौरव करत त्यांच्या नव्या जबाबदारीसाठी शुभेच्छा दिल्या. समाजाच्या सर्वांगीण विकासासाठी, समाजातील युवकांना संघटित करून समाजहिताचे विविध उपक्रम राबविण्यासाठी त्यांनी कार्य करावे, अशी अपेक्षा यावेळी व्यक्त करण्यात आली. या सत्कार समारंभाला माजी सभापती लहानू हिंदोळे सामाजिक कार्यकर्ते नवसु लचके, युवा नेते राजूभाऊ, देविदास हिंदोळे, सरपंच तथा मार्केट कमिटी संचालक ॲड. मारुती आघाण, खंबाळेचे माजी सरपंच कैलास शिद, सामाजिक कार्यकर्ते आकाश भले, उत्तम पारधी, मुकुंदा वारघडे, भाऊ खडके, अशोक शिद, लक्ष्मण भगत, गोविंद भले, सिताराम गावंडा, अशोक पिंगळे यांच्यासह अनेक सामाजिक कार्यकर्ते व समाजबांधव मोठ्या संख्येने उपस्थित होते. नवनिर्वाचित तालुकाध्यक्ष हरिश्चंद्र भले यांनी उपस्थित सर्व मान्यवरांचे आभार मानत समाजाने दिलेल्या विश्वासाला पात्र राहून समाजाच्या विकासासाठी प्रामाणिकपणे कार्य करण्याचा निर्धार व्यक्त केला. या कार्यक्रमामुळे इगतपुरी तालुक्यातील आदिवासी ठाकूर-ठाकर समाजामध्ये उत्साहाचे वातावरण निर्माण झाले असून, नाशिक जिल्हाध्यक्ष संजय लोते यांच्या मार्गदर्शनाखाली व नेतृत्वाखाली समाज संघटन अधिक मजबूत करून समाजहितासाठी प्रभावी कार्य करण्यात येईल, असा विश्वास उपस्थित मान्यवरांनी व्यक्त केला.
