भास्कर सोनवणे : इगतपुरीनामा न्यूज – मुख्यमंत्री ना. देवेंद्र फडणवीस यांचा वाढदिवस आणि स्व. उपमुख्यमंत्री अजितदादा पवार यांच्या जयंतीनिमित्त महसूल प्रशासनामार्फत छत्रपती शिवाजी महाराज महसूल अभियान’ अंतर्गत इगतपुरी तालुक्यात महसूल समाधान शिबिराचे आयोजन करण्यात आले आहे. नागरिकांना विविध शासकीय सेवा, प्रमाणपत्रे, योजनांची माहिती व तात्काळ मार्गदर्शन एकाच ठिकाणी, एकाच दिवशी उपलब्ध करून देण्याच्या उद्देशाने या शिबिराचे आयोजन करण्यात आले आहे. हे शिबिर उद्या मंगळवारी सकाळी १० ते सायंकाळी ५ वाजेपर्यंत, इंदुमती लॉन्स, पोलीस स्टेशनजवळ, वाडीवऱ्हे, ता. इगतपुरी येथे संपन्न होणार आहे. या शिबिराचे उदघाटन आमदार हिरामण खोसकर यांच्या हस्ते होणार असून, खासदार राजाभाऊ वाजे हे प्रमुख अतिथी म्हणून उपस्थित राहणार आहेत. कार्यक्रमास जिलाधिकारी आयुष प्रसाद, इगतपुरी त्र्यंबकेश्वरचे सहायक जिल्हाधिकारी तथा उपविभागीय अधिकारी व्ही. व्ही. एस. पवनदत्ता हे प्रमुख मार्गदर्शक म्हणून उपस्थित राहून नागरिकांना मार्गदर्शन करणार आहेत.
ह्या शिबिरामध्ये आधार नोंदणी व दुरुस्ती, उत्पन्न, जात व अधिवास (डोमिसाईल) दाखले, कुंभार समाजाचे ओळखपत्र,७/१२ उतारे, फेरफार नोंदी व नक्कल, ७/१२ व मालमत्ता पत्रक दुरुस्ती, तुकडेबंदी नियमीधीकरण व जनजागृती, बिनशेती एकरकमी अधिमूल्य विषयक सेवा, सामाजिक अर्थसहाय्य योजनांचा लाभ, नवीन व दुय्यम शिधापत्रिका, कर्जमाफी योजनांबाबत मार्गदर्शन, कृषी विभागाच्या विविध योजना, मुख्यमंत्री बळीराजा शेत पाणंद रस्ते योजना, सर्वांसाठी घरे व अतिक्रमण नियमितीकरण विधेयक सेवा, विविध शासकीय विभागांच्या योजनांची माहिती व लाभ, नागरिकांसाठी स्वतंत्र मार्गदर्शन व चौकशी कक्ष ह्या प्रमुख सेवा उपलब्ध असणार आहेत. महसूल विभागासह विविध शासकीय विभागांचे अधिकारी, कर्मचारी व तज्ज्ञ या शिबिरात उपस्थित राहून नागरिकांच्या प्रलंबित कामांचा निपटारा, विविध दाखल्यांचे वितरण, अर्ज स्वीकारणे, योजनांबाबत मार्गदर्शन व जनजागृती करणार आहेत. शासनाच्या सेवा “जनतेच्या दारी” पोहोचविण्याच्या उद्देशाने हे शिबिर नागरिकांसाठी एक सुवर्णसंधी ठरणार आहे. इगतपुरी व त्र्यंबकेश्वर तालुक्यातील सर्व नागरिकांनी आवश्यक कागदपत्रांसह मोठ्या संख्येने उपस्थित राहून या महसूल समाधान शिबिराचा लाभ घ्यावा असे आवाहन महसूल प्रशासनाच्या वतीने इगतपुरीचे तहसीलदार अभिजित बारवकर यांनी केले आहे.
