इगतपुरीनामा न्यूज – महाराष्ट्र प्रदेश काँग्रेस कमिटीच्या ‘संघटन सृजन’ अभियानांतर्गत सुरू असलेल्या संघटनात्मक बांधणीच्या प्रक्रियेत, इगतपुरी तालुका काँग्रेस कमिटीच्या अध्यक्षपदी रामदास पाटील धांडे यांची पुन्हा एकदा नियुक्ती करण्यात आली आहे. प्रदेश काँग्रेस कमिटीने नियुक्त केलेल्या निरीक्षकांनी नुकताच विविध जिल्ह्यांचा दौरा करून स्थानिक पदाधिकारी आणि कार्यकर्त्यांशी प्रत्यक्ष चर्चा केली होती. या भेटीदरम्यान मिळालेला सकारात्मक प्रतिसाद आणि कार्यकर्त्यांच्या भावना लक्षात घेऊन सादर केलेल्या अहवालानुसार, महाराष्ट्र प्रदेश काँग्रेस कमिटीचे प्रांताध्यक्ष हर्षवर्धन सपकाळ यांनी ही नियुक्ती जाहीर केली. रामदास पाटील धांडे यांच्या कार्यकाळात पक्षाची संघटनात्मक स्थिती मजबूत झाल्याचे निरीक्षण नोंदवण्यात आले होते. त्यांच्या कामावरील विश्वास व्यक्त करत पक्षाने त्यांना पुन्हा ही जबाबदारी सोपवली आहे. या नियुक्तीमुळे इगतपुरी तालुका काँग्रेसमध्ये उत्साहाचे वातावरण असून, पक्षाला आगामी काळात अधिक बळकटी मिळेल, असा विश्वास कार्यकर्त्यांकडून व्यक्त केला जात आहे. नियुक्ती जाहीर होताच रामदास पाटील धांडे यांचे सर्व स्तरांतून अभिनंदन करण्यात येत आहे.
