तातळेवाडी जवळ भीषण अपघातात ग्रामसेवकाचा जागीच मृत्यू

इगतपुरीनामा न्यूज – इगतपुरी तालुक्यातील घोटी सिन्नर महामार्गावर तातळेवाडी परिसरात झालेल्या भीषण अपघातात स्विफ्ट कार चालकाचा जागीच मृत्यू झाला. या अपघातामुळे परिसरात एकच खळबळ उडाली आहे. ट्रक क्र. KA32AA5257 हा घोटीहून सिन्नरच्या दिशेने जात होता, तर स्विफ्ट कार क्र. MH43V7847 ही सिन्नरहून घोटीच्या दिशेने येत होती. दोन्ही वाहने भरधाव वेगात असताना तातळेवाडीजवळ समोरासमोर धडकली. धडक इतकी भीषण होती की स्विफ्ट कारच्या दर्शनी भागाचा अक्षरशः चक्काचूर झाला. या भीषण अपघातात स्विफ्ट कारमधील चालक परशुराम पावजी पवार वय ४५ रा. नाशिक यांचा जागीच मृत्यू झाला. बेलगाव तऱ्हाळे येथे ते ग्रामसेवक म्हणून कार्यरत होते. या घटनेची माहिती मिळताच स्थानिक नागरिक व पोलिसांनी घटनास्थळी धाव घेतली. मृत चालकाला खाजगी रुग्णवाहिकेद्वारे एसएमबीटी रुग्णालय, धामणगाव येथे नेण्यात आले. अपघातग्रस्त दोन्ही वाहने रस्त्याच्या कडेला हलविण्यात आल्याने महामार्गावरील वाहतूक सुरळीत सुरू असल्याची माहिती पोलिसांकडून देण्यात आली. दरम्यान, अपघाताचे नेमके कारण आणि इतर बाबींचा तपास घोटी पोलीस ठाण्याचे अधिकारी व कर्मचारी करीत आहेत. या अपघातामुळे परिसरात हळहळ व्यक्त करण्यात येत असून वाहनचालकांनी वेगावर नियंत्रण ठेवून सुरक्षित वाहन चालविण्याचे आवाहन करण्यात येत आहे. व्हिडीओ बातमी पहा https://youtube.com/shorts/MbKuWaS941g?si=Mc-nMJgnBlZef3KZ