इगतपुरीनामा न्यूज – इगतपुरी तालुक्यात डेंग्यूने पुन्हा डोके वर काढले असून आरोग्य यंत्रणा सतर्क झाली आहे. तालुक्यात गेल्या वर्षभरात एकूण १३ रुग्णांना डेंग्यूची लागण झाल्याची नोंद झाली आहे. त्यापैकी या महिन्यात कांचनगाव येथील तब्बल ६ जणांना डेंग्यूची लागण झाल्याने ग्रामस्थांमध्ये चिंतेचे वातावरण निर्माण झाले आहे. इगतपुरीचे तालुका वैद्यकीय अधिकारी डॉ. मोहन बच्छाव यांनी दिलेल्या माहितीनुसार, कांचनगावातील डेंग्यू बाधितांपैकी एका युवकाचा दुर्दैवी मृत्यू झाला आहे. या घटनेनंतर आरोग्य विभागाने परिस्थिती गांभीर्याने घेत तातडीने उपाययोजना सुरू केल्या आहेत.
डेंग्यूचा प्रादुर्भाव वाढू नये यासाठी वैद्यकीय पथक कांचनगावात दाखल झाले असून घराघरांत जाऊन नागरिकांची तपासणी केली जात आहे. ताप, अंगदुखी, डोकेदुखी आदी लक्षणे असलेल्या नागरिकांची आरोग्य तपासणी करून आवश्यक उपचार दिले जात आहेत. याशिवाय गावात डासांच्या उत्पत्तीची ठिकाणे शोधून त्यांचे निर्मूलन करण्याबाबत जनजागृती मोहीम राबविण्यात येत आहे. घरांच्या परिसरात साचलेले पाणी काढून टाकणे, पाण्याची भांडी झाकून ठेवणे आणि स्वच्छता राखणे याबाबत नागरिकांना सूचना देण्यात येत आहेत. दरम्यान, वाढत्या डेंग्यूच्या पार्श्वभूमीवर वैद्यकीय यंत्रणा अलर्ट मोडवर असून नागरिकांनी ताप किंवा डेंग्यूसदृश लक्षणे आढळल्यास तातडीने जवळच्या शासकीय रुग्णालयात तपासणी करून घ्यावी, असे आवाहन आरोग्य विभागाने केले आहे.
