इगतपुरीनामा न्यूज – आज नाशिकचे जिल्हा न्यायाधीश श्री. दळवी यांच्या न्यायालयात नाशिक तालुका पोलीस ठाण्यात दाखल खटल्याची सुनावणी पुर्ण झाली. ह्या गुन्ह्यातील आरोपी संदीप पोपट गोतरणे रा. यशवंतराव चव्हाण मुक्तविद्यापीठ गोवर्धन जि. नाशिक याच्या विरूध्द आरोप सिध्द झाले. न्यायालयाने त्याला दोषी ठरवुन १) भादवि कलम ३०२ मध्ये आजन्म कारावास व ५ हजार रूपये दंड २) भादवि कलम २०१ मध्ये ३ वर्षे सश्रम कारावास व ५ हजार रूपये दंड ३) भादवि कलम ५०६ मध्ये ७ वर्ष सश्रम कारावास व ५ हजार रूपये दंड अशी शिक्षा देण्यात आली आहे. ४) दंडाची १५ हजार रूपये रक्कम गुन्ह्यातील प्रत्यक्षदर्शी साक्षीदाराला देण्यात यावी असा आदेश दिला आहे.
ही घटना १८ मे २०२२ रोजी महादेवपुर शिवारात मोंढे फार्म रस्ता धुपकर यांच्या फ्लॅटमध्ये, ता. जि. नाशिक येथे घडली होती. आरोपी व फिर्यादी यांच्यात सुमारे ३ वर्षा पासून प्रेम संबंध होते. ते मयतास माहित झालेले होते. मयत व फिर्यादी असे त्यांच्या ४ नंबरच्या खोलीत गप्पा मारत असतांना आरोपी हातात कोयता घेऊन आला. फिर्यादीच्या पतीला म्हणाला की, तु कुसुमला माझ्याशी बोलायला व भेटायला का नाही म्हणतो. आमचे प्रेम संबंध आहे. तु आमच्या रस्त्यात येतो. तुला संपवून टाकतो असे म्हणून त्याने हातातील लोखंडी कोयत्याने मयताच्या डोक्यावर, मानेवर, पाठीवर, गालावर सपासप वार करून त्याने फिर्यादीच्या पतीला जिवे ठार मारले म्हणून गुन्हा दाखल होता.
ह्या गुन्ह्याचा तपास नाशिक तालुका पोलीस ठाण्याच्या तत्कालीन पोलीस निरीक्षक सारिका आहिरराव यांनी केला होता. त्यांनी आरोपी विरूध्द भक्कम पुरावे गोळा करून सत्र न्यायालयात दोषारोपपत्र दाखल केले होते. ह्या खटल्यात सरकारी अभियोक्ता सचिन गोरवाडकर यांनी कामकाज पाहिले. पैरवी अंमलदार म्हणुन सपोउनि मधुकर पवार व पोना विकास कऱ्हाड यांनी कामकाज पाहिले. यातील आरोपीविरूध्द गुन्हा शाबीत झाला आहे. गुन्हे दोषसिध्दी विभाग नाशिक येथील सपोनि श्रीकांत पाटील व महिला पोलीस अंमलदार अश्विनी परदेशी यांनी गुन्हा शाबीत होण्याच्या अनुषंगाने वेळोवेळी कायदेशीर मार्गदर्शन करून पाठपुरावा केला. ह्या उल्लेखनीय कामगिरीबद्दल पोलीस अधीक्षक डॉ. डी. एस. स्वामी व अपर पोलीस अधीक्षक विमला एम. यांनी तपासी अंमलदार, पैरवी अंमलदार व दोषसिध्दी विभागातील अधिकारी व अंमलदार यांचे विशेष अभिनंदन केले आहे
