इगतपुरीनामा न्यूज – इगतपुरी तालुक्यातील नागरिकांसाठी अत्यंत दिलासादायक आणि महत्त्वाची बाब म्हणजे इगतपुरी येथे ट्रॉमा केअर सेंटरसह महाडायलिसिस सेंटरचे लोकार्पण नुकतेच संपन्न झाले आहे. या उपक्रमामुळे ग्रामीण आणि आदिवासी भागातील रुग्णांना आता अत्याधुनिक वैद्यकीय सुविधा स्थानिक पातळीवर उपलब्ध होणार आहेत. या ट्रॉमा केअर सेंटरमध्ये पाच आधुनिक मशिनद्वारे डायलिसिस सेवा सुरू करण्यात आली आहे. यामुळे किडनीच्या आजारांनी त्रस्त असलेल्या रुग्णांना वेळेवर आणि दर्जेदार उपचार मिळणार आहेत. विशेष म्हणजे, येथे डायलिसिस आणि आवश्यक औषधोपचार विनामूल्य देण्यात येणार असल्याने गरजू रुग्णांना मोठा दिलासा मिळणार आहे. या केंद्रात अत्याधुनिक शस्त्रक्रिया (ऑपरेशन) सुविधा देखील सुरू करण्यात आली आहे. यामुळे लहान मोठ्या शस्त्रक्रियांसाठी आता नागरिकांना नाशिक, मुंबईसारख्या मोठ्या शहरांमध्ये जाण्याची गरज भासणार नाही. इगतपुरी तालुका आदिवासी बहुल असल्यामुळे येथील नागरिकांना आरोग्य सुविधांचा अभाव जाणवत होता. मात्र या नव्या केंद्रामुळे स्थानिक पातळीवरच उपचार मिळणार असल्याने वेळ आणि खर्च दोन्हीची बचत होणार आहे. एकूणच, या ट्रॉमा केअर आणि महाडायलिसिस सेंटरमुळे इगतपुरी तालुक्यातील आरोग्य व्यवस्थेला मोठा आधार मिळणार असून हजारो नागरिकांना याचा थेट फायदा होणार आहे.
