इगतपुरीनामा न्यूज – इंदूर येथे आयोजित अखिल भारतीय दिगंबर जैन महिला परिषदेच्या राष्ट्रीय परिषदेत राष्ट्रीय अध्यक्षा निर्मला जैन व प्रांतीय अध्यक्षा टीना पांड्या (मुंबई) यांच्या नेतृत्वाखाली कार्यरत पेहेचान प्रगती फाउंडेशनने उल्लेखनीय यश संपादन करत चार प्रतिष्ठित राष्ट्रीय पुरस्कार आपल्या नावावर केले. संस्थेच्या अध्यक्षा प्रगती अजमेरा यांच्या नेतृत्वाखाली राबविण्यात आलेल्या सामाजिक कार्य व महिला सक्षमीकरणाच्या उपक्रमांना राष्ट्रीय स्तरावर विशेष दाद मिळाली. या परिषदेत संस्थेला सर्वोत्कृष्ट अध्यक्षा, सर्वोत्कृष्ट क्लब, महिलांना आत्मनिर्भर बनविण्यासाठी राबविण्यात आलेल्या महिला उत्पादन व उद्योजकता प्रोत्साहन कार्यासाठी विशेष सन्मान आणि इगतपुरी परिसरात केलेल्या उत्कृष्ट सामाजिक कार्याबद्दल पुरस्कार प्रदान करण्यात आले. ग्रामीण व आदिवासी भागातील महिलांना रोजगाराच्या संधी उपलब्ध करून देणे, कौशल्य विकास प्रशिक्षण देणे आणि आर्थिक स्वावलंबनाकडे प्रेरित करणे ही संस्थेच्या कार्याची महत्त्वपूर्ण वैशिष्ट्ये ठरली आहेत.
नाशिक जिल्ह्यातील इगतपुरी तालुक्यात शिक्षण, आरोग्य, महिला विकास व सामाजिक उन्नतीसाठी राबविण्यात आलेल्या विविध उपक्रमांमुळे संस्थेला राष्ट्रीय स्तरावर ओळख मिळाली आहे. या प्रयत्नांमुळे ग्रामीण महिलांमध्ये आत्मविश्वास वाढला असून अनेक महिला उद्योजकतेकडे वाटचाल करत आहेत.
पुरस्कार स्वीकारताना अध्यक्षा प्रगती अजमेरा म्हणाल्या, “महिलांना संधी, प्रशिक्षण आणि योग्य मार्गदर्शन मिळाले तर त्या समाज परिवर्तनाची सक्षम शक्ती ठरू शकतात. हा सन्मान आमच्या संपूर्ण टीमच्या कार्याचा आणि समाजाने दाखवलेल्या विश्वासाचा परिणाम आहे.” राष्ट्रीय परिषदेत मिळालेल्या या चार पुरस्कारांमुळे पेहेचान प्रगती फाउंडेशनच्या कार्याला देशभर नवी ओळख मिळाली असून ही बाब मुंबई व महाराष्ट्रासाठी अभिमानास्पद ठरली आहे. संस्थेची ही कामगिरी सामाजिक क्षेत्रात कार्य करणाऱ्या इतर संस्थांसाठी प्रेरणादायी ठरत आहे.