इगतपुरीनामा न्यूज – १३ एप्रिलला नाशिक तालुका पोलीस ठाणे हद्दीत विल्होळी शिवारात सुरजकुमार मोहनलाल सोलंकी (जैन), रा. अमरधाम रोड, नानावली, जुने नाशिक याच्यावर प्राणघातक हल्ला झाला होता. त्याला कोणीतरी अज्ञात महिला व पुरुषाने मोबाईलवर झालेल्या बोलाचालीच्या कारणावरून लोखंडी कोयत्याने व दगडाने दोन्ही हातावर, मानेवर, डोक्याच्या मागील बाजुला गंभीर वार करून जिवे ठार मारण्याचा प्रयत्न केला आहे. म्हणुन नाशिक तालुका पोलीस ठाण्यात भा. न्या. सं. कलम १०९ प्रमाणे गुन्हा दाखल करण्यात आला होता. हा गुन्हा केल्यानंतर यातील संशयित महिला व पुरुष यांनी अज्ञातस्थळी पलायन केले होते. ह्या घटनेचे गांभीर्य लक्षात घेता नाशिक ग्रामीण जिल्हा पोलीस अधीक्षक बाळासाहेब पाटील व अपर पोलीस अधीक्षक आदित्य मिरखेलकर यांनी तात्काळ दखल घेऊन पोलीस पथकांना आरोपींच्या शोधासाठी मार्गदर्शन करून सुचना दिल्या. ह्या घटनेच्या अनुषंगाने उपविभागीय पोलीस अधिकारी पेठ विभाग वासुदेव देसले, स्थानिक गुन्हे शाखेचे प्रभारी पोलीस निरीक्षक दत्तात्रय शिंदे, नाशिक तालुका पोलीस ठाण्याच्या पोलीस निरीक्षक मृदूला नाईक यांनी तात्काळ घटनास्थळी भेट देवुन घडल्या परिस्थितीची बारकाईने पाहणी केली. यातील जखमी सुरज सोलंकी याचे दैनंदिन कामकाज, पुर्व इतिहास व सध्याच्या वास्तव्याबाबत गोपनीयरित्या माहिती घेवुन तपासाची चक्रे फिरवली. त्यानुसार त्याचे अलिकडील कालावधीत एका महिलेशी वाद असल्याचे निदर्शनास आले होते. त्याप्रमाणे तपास केला असता, यातील महिला व तिचा पती हे दोघेजण घटना घडल्यापासुन फरार असल्याचे समजले. त्यावरून त्यांचा शोध घेतला असता १ ) हनुमंत आण्णासाहेब शिंदे, वय ४२, रा. अंधापुरी, ता. पाथरी, जि. परभणी, हल्ली रा. विठाई नगर, नामको हॉस्पिटलमागे, पेठरोड नाशिक, २) साधना हनुमंत शिंदे, वय ३७, रा. पैठण, जि. छत्रपती संभाजी नगर, हल्ली विठाई नगर, नागको हॉस्पिटल मागे, पेठरोड नाशिक या आरोपींना नाशिक व अहिल्यानगर जिल्ह्याच्या सीमावर्ती भागातील एका खेडेगावातून ताब्यात घेण्यात आले.
यातील आरोपी महिला साधना शिंदे हिच्याकडे गुन्ह्याच्या अनुषंगाने सखोल चौकशी केली असता, ह्या घटनेतील जखमी सुरज सोलंकी व आरोपी साधना शिंदे यांची दोघांची वाडीवऱ्हे येथील एका कंपनीत ओळख झाली होती. तेव्हापासून ते दोघे एकमेकांना ओळखत होते. कालांतराने सुरज सोलंकी हा साधना हिला ब्लॅकमेल करून, तिच्याकडे अनैतिक संबंधाची मागणी करू लागला. तो तिला व तिच्या परिवाराला जिवे मारण्याची धमकी देत होता. ह्या गोष्टीचा राग मनात धरून साधना व तिचा पती हनुमंत शिंदे यांनी दोघांनी मिळून त्याला विल्होळी शिवारात बोलावुन त्याच्याशी झटापट करून त्याच्या हातावर, मानेवर, डोक्याचे पाठीमागील बाजूस कोयत्याने व दगडाने गंभीर वार करून जिवे ठार मारण्याचा प्रयत्न केला असल्याची कबुली दिली आहे. ह्या २ संशयित आरोपींना ह्या गुन्ह्यात अटक करण्यात आली असून न्यायालयाने दोन दिवस पोलीस कोठडी रिमांड मंजुर केली आहे. ह्या गुन्ह्याचा पुढील तपास नाशिक तालुका पोलीस ठाण्याच्या पोलीस निरीक्षक मृदुला नाईक यांचे पथक करीत आहे. पोलीस अधीक्षक बाळासाहेब पाटील, अपर पोलीस अधीक्षक आदित्य मिरखेलकर व उपविभागीय पोलीस अधिकारी पेठ विभाग वासुदेव देसले यांच्या मार्गदर्शन व सुचनांप्रमाणे स्थानिक गुन्हे शाखेचे प्रभारी पोलीस निरीक्षक दत्तात्रय शिंदे, नाशिक तालुका पो.स्टे. च्या पोलीस निरीक्षक मृदूला नाईक, स्थागुशाचे सपोनि नितीन रणदिवे, प्रकाश भालेराव, उपनिरीक्षक शैलेश पाटील, सपोउनि नवनाथ सानप, हवालदार प्रविण काकड, संदिप नागपुरे, रावसाहेब कांबळे, हेमंत गिलबिले, धनंजय शिलावटे, प्रदिप बहिरम, संतोष ढोंदे, किशोर बोडके, नितीन गांगुर्डे, ललिता शिरसाठ, अस्मिता मढवई, नाशिक तालुका पोस्टे चे पोहवा निलेश मराठे, शितल गायकवाड, अनिल गुरडनर, प्रकाश वाजे, मंगेश पानझाडे यांच्या पथकाने हा गुन्हा उघडकीस आणुन कामगिरी केली आहे.
