इगतपुरीनामा न्यूज – इगतपुरी शहरात हनुमान जयंतीनिमित्त विविध धार्मिक व सांस्कृतिक कार्यक्रमांच्या माध्यमातून मोठ्या उत्साहात उत्सव साजरा करण्यात आला. गुप्ता व्यायामशाळा येथून ढोल-ताशांच्या गजरात व डीजेच्या सुरावटीत भव्य शोभायात्रेला सुरुवात झाली. श्री हनुमान व्यायाम प्रसारक मंडळ, गुप्ता व्यायामशाळा यांच्या वतीने बैलगाडीवर आकर्षक सजवलेल्या हनुमान प्रतिमेची मिरवणूक काढण्यात आली. ही शोभायात्रा शिवाजी चौक, गांधी चौक, जुना मुंबई-आग्रा मार्ग, रेल्वे स्थानक, पटेल चौक, भाजी मंडई आदी प्रमुख मार्गांवरून काढण्यात येत अखेरीस गुप्ता व्यायामशाळेत समारोप करण्यात आला. मिरवणुकीदरम्यान लाठी-काठी, दांडपट्टा, छडीपट्टा, तलवारबाजी यांसारख्या पारंपरिक खेळांचे थरारक सादरीकरण करण्यात आले. या कलेने नागरिकांना अक्षरशः मंत्रमुग्ध केले. गुप्ता व्यायामशाळा व परिसरात आकर्षक विद्युत रोषणाई, पताका व रंगरंगोटी करून उत्सवी वातावरण निर्माण करण्यात आले होते. पहाटेच्या सुमारास हनुमान प्रतिमेचे पूजन करून हनुमान चालीसा पठण करण्यात आले. यावेळी हनुमान व्यायाम प्रसारक मंडळाचे अध्यक्ष बद्रीनाथ शर्मा, महावीर शर्मा, सामाजिक कार्यकर्ते पुरुषोत्तम चांडक, शांतराम रिखे, शिरीष यादव, धनराज शर्मा, महेश शिरोळे, सोमनाथ सद्गुरू, नितीन दळवी, सागर सद्गुरू, राजेंद्र शर्मा, शोभराज शर्मा, योगेंद्र शर्मा, शैलेश शर्मा, विशाल गायकवाड, विकी थोरात, भाऊ पासलकर, गिरधर रिखे, अनिल भोपे, कमलेश शर्मा आदी मान्यवर उपस्थित होते. अहिल्यानगर येथील ‘शौर्य मर्दानी खेळ’ समूहातील सुमारे २० मुला-मुलींनी लाठी-काठी, दांडपट्टा, छडीपट्टा आणि तलवारबाजीचे उत्कृष्ट प्रात्यक्षिक सादर करत इगतपुरीकरांची मने जिंकली. या पथकाला भाऊसाहेब अजिनाथ दळवी यांनी प्रशिक्षण दिले आहे.
