इगतपुरीनामा न्यूज – अल्पवयीन मुलींच्या अपहरणाच्या घटनांमध्ये वाढ झाली आहे. अशा प्रकरणात भारतीय न्याय संहिता आणि पोक्सो कायद्याअंतर्गत कडक कारवाईची तरतूद आहे. राहत्या घरून, शाळा, शिकवणीला जाताना मुलींचे अपहरण होण्याचे प्रकार समोर आले आहेत. अशा वेळी तात्काळ पोलिसात ११२ क्रमांकावर तक्रार नोंदवणे आवश्यक आहे. इगतपुरी पोलीस ठाणे हद्धीत एका गावातील ११ वी मध्ये शिकणाऱ्या एका अल्पवयीन मुलीचे अज्ञात आरोपीने २७ मार्चला राहत्या घरातून अपहरण केल्याची फिर्याद तिच्या पालकांनी इगतपुरी पोलीस ठाण्यात दाखल केली. त्यानुसार इगतपुरी पोलिसांनी अपहरणाचा गुन्हा दाखल करून तपासाची जोरदार सूत्रे हलवली. त्यानुसार पोलिसांना अवघ्या काही तासात मुलीचा शोध घेण्यात यश आले आहे. कसारा रेल्वे स्थानकातून तिला ताब्यात घेण्यात आले आहे. इगतपुरी पोलिसांनी तिला पालकांच्या सुखरूप स्वाधीन केले आहे. या प्रकरणाबाबत कसून तपास सुरु करण्यात आला आहे. पोलीस निरीक्षक सारिका अहिरराव आणि पथक अधिक तपास करीत आहेत.
