इगतपुरीनामा न्यूज – जनसेवा प्रतिष्ठानच्या माध्यमातून इगतपुरी तालुक्यासह संपूर्ण शहरभर गेल्या २५ वर्षांपासून समाजसेवा आणि विविध उपक्रम राबवणारे जनसेवक किरण फलटणकर यांना इगतपुरी नगरपरिषदेत स्वीकृत नगरसेवक होण्याचा सन्मान लाभला आहे. समाजकार्यात झोकून काम करण्यात ते सातत्याने अग्रेसर आहेत. त्यांच्या निवडीमुळे इगतपुरी शहराच्या विकासकामांना नवे बळ मिळेल. नगरपरिषदेत सामान्य माणसाला केंद्रीभूत ठेवून ते चांगले काम उभे केल्याशिवाय राहणार नसल्याचा विश्वास इगतपुरीकर नागरिकांनी व्यक्त केला. गोरगरीब विद्यार्थ्यांना मदत, आदिवासी वाड्यांवर जाऊन शिधा व ब्लॅंकेट वाटप, दरवर्षी विद्यार्थी गुणगौरव समारंभ आणि कोरोनासारख्या भयानक काळात जीव पणाला लावून केलेली मदत या कामांची पावती म्हणून त्यांना नगरसेवकपद मिळाले आहे. संस्कार, संस्कृती आणि संघर्ष यांची शिकवण देणाऱ्या त्यांच्या मातोश्री स्व. पुष्पाताई फलटणकर, वडील स्व. पदमाकर फलटणकर आणि खांद्याला खांदा लावून सामाजिक सेवेचे व्रत जोपासणाऱ्या त्यांच्या सौभाग्यवती स्व. मनीषाताई फलटणकर हे तिन्ही व्यक्ती हे यश पाहायला नसल्याचे त्यांना दुःख आहे. मात्र इगतपुरीकर नागरिकांच्या सेवेसाठी मिळालेल्या पदाच्या माध्यमातून जनसेवेचा वारसा अधिकाधिक दृढ करू अशी प्रतिक्रिया नूतन नगरसेवक किरण फलटणकर यांनी दिली.
