इगतपुरीनामा न्यूज – सावित्रीबाई फुले पुणे विद्यापीठ अंतर्गत विद्यार्थी विकास मंडळ आणि नाशिक शिक्षण प्रसारक मंडळ संचलित इगतपुरी येथील कला व वाणिज्य महाविद्यालयात निर्भय कन्या अभियान अंतर्गत विविध विषयावर मार्गदर्शनपर कार्यशाळा पार पडली. कार्यशाळेच्या अध्यक्षस्थानी महाविद्यालयाच्या प्राचार्या प्रतिभा हिरे होत्या. या कार्यशाळेत तीन प्रमुख व्याख्यात्यांची व्याख्याने झाली. माजी विद्यार्थी ॲड. महेश म्हसणे यांनी महिलांसाठी महत्त्वाच्या कायद्याची माहिती देत कायद्याच्या चौकटीत न्यायाधिकार यावर मार्गदर्शन केले. विशाल जगताप यांनी मुलींना स्व संरक्षणावर मार्गदर्शन करून प्रत्यक्ष कराटे प्रशिक्षण देत स्वयं संरक्षणाचे धडे दिले. संकट प्रसंगात मार्ग काढून संरक्षण यावर मार्गदर्शन केले. डॉ. काजल परदेशी यांनी महिलांचे मानसिक आरोग्य, मुलींच्या आरोग्याबाबत गैरसमजुती, योग्य आहार व मर्यादा सांभाळून वर्तणूक यावर भाष्य केले. प्रा. शशिकांत सांगळे यांनी कार्यशाळेचा उद्देश, भूमिका विशद केली व्याख्यात्यांचा परिचय प्रा. अविनाश कासार यांनी करून दिला. सूत्रसंचालन इंग्रजी विभाग प्रमुख प्रा. बी. एस. मोरे यांनी तर आभार प्रा. रवींद्र नाडेकर यांनी मानले. महाविद्यालयीन समन्वयक डॉ. बी. एच. घुटे यांचे सहकार्य लाभले. यावेळी सर्व प्राध्यापक व प्राध्यापकेतर कर्मचारी व विद्यार्थिनीं उपस्थित होत्या.
