भास्कर सोनवणे : इगतपुरीनामा न्यूज – इगतपुरी पंचायत समितीच्या १० गणांसाठी आज आरक्षण सोडत काढण्यात आली. यातील ५ गण विविध प्रवर्गाच्या महिलांसाठी आरक्षित करण्यात आले. एकूण पंचायत समिती गणांपैकी अनुसूचित जमातीसाठी ४, अनुसूचित जातीसाठी १, नागरिकांच्या मागास प्रवर्गासाठी २, सर्वसाधारण प्रवर्गासाठी ३ गण आरक्षित करण्यात आले. इगतपुरी त्र्यंबकेश्वरचे उपविभागीय अधिकारी जीव्हीएस पवन दत्ता , तहसीलदार अभिजित बारवकर, निवासी नायब तहसीलदार धनंजय लचके यांच्या उपस्थितीत आरक्षण निश्चित करण्यात आले.
पंचायत समिती सभागृहात झालेल्या आरक्षण सोडतीसाठी तालुक्यातील सर्वपक्षीय कार्यकर्ते उपस्थित होते. अनुसूचित जाती प्रवर्गाच्या महिलेसाठी घोटी बुद्रुक हा गण राखीव झाल्याने येथून निवडून येणारी महिला इगतपुरीची सभापती होणार आहे. ओबीसीसाठी कावनई, ओबीसी स्त्री साठी नांदगाव सदो, अनुसूचित जाती स्त्री साठी घोटी बुद्रुक, सर्वसाधारण साठी वाडीवऱ्हे, साकुर, सर्वसाधारण स्त्री साठी मुंढेगाव, अनुसूचित जमाती स्त्री साठी धामणगाव ( जुना टाकेद बुद्रुक गण), खंबाळे, अनुसूचित जमातीसाठी – बेलगाव तऱ्हाळे ( जुना खेड गण ), काळूस्ते हे गण आरक्षित करण्यात आले.
