इगतपुरीनामा न्यूज – वनपरिमंडळ कुशेगाव अंतर्गत वाडीवऱ्हे येथे आज वन्यजीव सप्ताहानिमित्ताने ब्राईट इंग्लिश मीडियम स्कूल शाळेत मानव बिबट संघर्ष विषयावर कार्यक्रम आयोजित करण्यात आला होता. ह्या शाळेत प्रामुख्याने वाडीवऱ्हे मधील सर्व वाड्या व आजूबाजूच्या भागातील विद्यार्थी येथे शिकण्यासाठी येतात. त्या अनुषंगाने मानव बिबट जनजागृती हा कार्यक्रम आयोजित करण्यात आला होता. प्रामुख्याने अभिजित महाले, प्रमुख बचाव कार्य नाशिक विभाग यांनी वन्यप्राणी ,पशु पक्षी यांचा अधिवास, मनुष्याची त्यांच्या अधिवासात झालेले अतिक्रमण, बिबट्या वन्य प्राण्यांविषयी समज गैरसमज यावर व्हिडिओच्या माध्यमातून सविस्तर मार्गदर्शन केले. शोभा निखाडे, वनपाल कुशेगाव व सोमनाथ गाढवे, वनरक्षक कुशेगाव यांनीही मार्गदर्शन केले. कार्यक्रमासाठी शाळेच्या मुख्याध्यापिका सुरेखा आवारे व सर्व शिक्षक कर्मचारी बंधू-भगिनी व विद्यार्थी उपस्थित होते. विद्यार्थ्यांनी प्रश्न विचारून आपल्या शंकांचे निरसन करून घेतले. कार्यक्रमाचे आयोजन शोभा निखाडे वनपाल कुशेगाव यांनी केले.