इगतपुरीनामा न्यूज – इगतपुरी तालुक्यात ‘ट्रिगर १’ लागू झाल्यामुळे शासनाने इगतपुरी तालुक्याला दुष्काळग्रस्त म्हणून जाहीर केले आहे. दुष्काळग्रस्त शेतकऱ्यांना शासनाकडून मिळणारी अनुज्ञेय आर्थिक मदत लवकरात लवकर देण्यासाठी खरीप पिकांच्या नुकसानीचे पंचनामे तात्काळ सुरू करण्यात आले आहेत. ज्या शेतकऱ्यांकडे ‘फार्मर आयडी’ (Farmer ID) नसेल, त्यांना ही आर्थिक मदत मिळणार नाही. मदतीचा लाभ घेण्यासाठी आपल्या पिकाची नोंद ऑनलाईन पीक पाहणीमध्ये करणे अनिवार्य आहे. कोणतीही दिरंगाई न करता लवकरात लवकर आपल्या मोबाईल ॲपवरून किंवा संबंधित यंत्रणेमार्फत ऑनलाईन पीक पाहणीची नोंद पूर्ण करून घ्यावी. आपला फार्मर आयडी त्वरित तयार करून त्याची नोंदणी सुनिश्चित करावी असे महत्वाचे आवाहन इगतपुरीचे तहसीलदार अभिजित बारवकर यांनी केले आहे. ऑनलाईन पीक पाहणी आणि फार्मर आयडी तयार केल्याने पिकांच्या नुकसानीचे पंचनामे सुरळीत पार पडतील आणि शासनाकडून मिळणारी दुष्काळी आर्थिक मदत मिळण्यात कोणतीही अडचण येणार नाही असेही तहसीलदार अभिजित बारवकर यांनी कळवले आहे.
